Protestat e nxënësve për gjendjen e arsimit publik kanë vijuar edhe të premten në disa qytete të Francës, duke u shoqëruar me përleshje me policinë dhe incidente pranë shkollave. Mbi 400 institucione arsimore kanë mbetur të mbyllura, ndërsa qindra të rinj janë arrestuar gjatë ditëve të fundit. Në Strasburg, protestuesit ngritën barrikada në rrugë, ndërsa policia përdori gaz lotsjellës për shpërndarjen e turmës. Në Lion dhe qytete të tjera protestat vijuan në mënyrë më paqësore.
Nxënësit kërkojnë më shumë investime në arsim dhe kundërshtojnë kushtet në shkolla. Ata ankohen për klasat e mbipopulluara, mungesën e mësuesve dhe faktin që pedagogët që mungojnë nuk zëvendësohen në kohë. “Jemi 35 nxënës për klasë, nuk kemi mjaftueshëm karrige në klasa dhe pushimi njëorësh i drekës është shumë i shkurtër që të gjithë të marrin ushqim”, tha për Reuters Kesia, një nxënëse 15-vjeçare nga periferia e Parisit.
Përballë përshkallëzimit të situatës, ministri francez i Drejtësisë, Gerald Darmanin, paralajmëroi se protestat mund të vijojnë edhe gjatë fundjavës. Përfaqësuesit e nxënësve, pas një takimi me ministrin e Arsimit, prindër dhe stafin arsimor, kanë bërë thirrje që protestat të vazhdojnë në mënyrë paqësore.
Ndërkohë, autoritetet kanë ndaluar tubimet pranë disa shkollave të mbyllura. Ministri Darmanin ka propozuar gjithashtu që prindërit të mbajnë përgjegjësi financiare për dëmet e shkaktuara nga fëmijët e tyre, propozim që është kundërshtuar nga partia e majtë “France Unbowed”.
Sondazh
Lexo gjithashtu
