Rusia ka paralajmëruar NATO-n se është e gatshme të përdorë të gjithë arsenalin e saj, përfshirë armët bërthamore, nëse vendet e aleancës tentojnë të izolojnë Kaliningradin nga pjesa tjetër e territorit rus.
Paralajmërimi është bërë përmes një dokumenti diplomatik të dërguar NATO-s, ndërsa Moska pretendon se ka informacione se aleanca po përgatit një bllokadë ajrore dhe detare të rajonit.
Kaliningradi është një enklavë ruse në Detin Baltik, e rrethuar nga Polonia dhe Lituania, të dyja vende anëtare të NATO-s. Rajoni ka rëndësi të madhe strategjike për Moskën dhe shërben si bazë për Flotën Ruse të Baltikut, ndërsa aty janë vendosur edhe raketa Iskander me kapacitet për mbartje të ngarkesave bërthamore.
Në dokumentin e saj, Rusia e akuzon NATO-n për ndjekjen e një kursi “të rrezikshëm dhe të pamatur” dhe paralajmëron edhe për mundësinë e goditjeve ndaj qendrave të vendimmarrjes në vendet anëtare të aleancës në rast të një konflikti.
NATO e ka hedhur poshtë pretendimin se po përgatit ndonjë bllokadë ndaj Kaliningradit. Zëdhënësja Allison Hart deklaroi se aleanca është mbrojtëse dhe se aktivitetet apo stërvitjet e saj nuk përbëjnë kërcënim për territorin rus. Ajo e cilësoi retorikën bërthamore të Moskës si të papërgjegjshme.
Paralajmërimi vjen në një moment tensionesh të shtuara në rajonin e Baltikut, ku NATO ka zhvilluar një seri stërvitjesh ushtarake dhe ka forcuar praninë e saj përballë shqetësimeve për veprimtari hibride dhe incidente të lidhura me Rusinë.
Ndërkohë, presidenti rus Vladimir Putin e ka përsëritur më 1 tetor se Rusia do të përdorë “të gjitha armët” nëse territori i saj kërcënohet, duke përfshirë edhe Kaliningradin.
