Prindërit e një foshnjeje 9-ditëshe, e cila u gjet pa shenja jete në një hotel në Cornwall, janë dënuar me burgim me kusht pasi pranuan akuzën për keqtrajtim të fëmijës. Andreë Maunder dhe Rochelle Thomas u dënuan me nga 30 muaj burg, por gjykata vendosi që dënimi të pezullohej për tre vjet.
Vajza e tyre, Darcey Maunder, lindi më 2 nëntor 2023 dhe vdiq në një hotel në Newquay më 11 nëntor. Nëna e Thomas, e cila ndodhej me familjen, dëgjoi të qara nga dhoma dhe kur vajti e gjeti foshnjën që nuk reagonte më. Pavarësisht ndërhyrjes së policisë dhe ekipeve mjekësore, Darcey nuk u arrit të reanimohej. Në dhomën e hotelit u gjetën tuba, peshore dhe një qese plastike me kokainë. Maunder pranoi se kishte konsumuar kokainë në dhomë, ndërsa analizat e flokëve të nënës treguan përdorim të drogës, përfshirë periudhën e shtatzënisë.
Prokuroria tha se Darcey mund ta kishte marrë kokainën përmes ushqyerjes me gji, kontaktit me duart e prindërve ose sendeve të kontaminuara. Gjykatësi Simon Carr tha se gjykata mori një vendim “të jashtëzakonshëm”, pasi ngjarja kishte ndodhur tre vjet më parë dhe shkaku përfundimtar i vdekjes nuk ishte përcaktuar. Ai theksoi se prindërit nuk u konsideruan përgjegjës për vdekjen e vajzës. Gjykatësi tha se të dy kishin treguar pendesë të sinqertë dhe se dënimi me burgim të menjëhershëm nuk do të sillte përfitim.
