Moti i keq në Kretë, 23 persona evakuohen pas përmbytjeve të mëdha

Moti i keq ka shkaktuar probleme të shumta në ishullin e Kretës në Greqi.

Reshjet e dendura të shiut gjatë natës shkaktuan përmbytje kryesisht në zonën e Ierapetrës, veçanërisht në Ferma dhe Makry Gialos. Ekipet e zjarrfikësve ndërhynë në disa raste, ndërsa në total 23 persona u shpëtuan nga banesat dhe automjetet dhe u dërguan në vende të sigurta.

Shërbimet zjarrfikëse morën dhjetëra thirrje për pompimin e ujërave, pasi reshjet shkaktuan përmbytje në banesa dhe biznese.

Ndërkohë në Flamouriana, në Bashkinë e Agios Nikolaos, ujërat morën me vete sasi të mëdha mbeturinash, të cilat përfunduan në rrugë duke vështirësuar qarkullimin

Ekipet e ndërhyrjes vijojnë punën për pastrimin e rrugëve dhe largimin e materialeve të sjella nga ujërat, me qëllim rikthimin gradual të qarkullimit.

Shërbimet zjarrfikëse dhe autoritetet lokale mbeten në gatishmëri për përballimin e çdo situate të re.