Një 21-vjeçar është arrestuar nga Policia në Dibër, pasi dyshohet se kërcënoi pronarin e një karburanti në Peshkopi duke i kërkuar 50 mijë euro. Për të frikësuar biznesmenin, i riu kishte lënë në ambientet e karburantit një kuti pice të modifikuar, të paraqitur si pajisje shpërthyese.
Pagesa kërkohej të kryhej në kriptomonedha, përmes një pike këmbimi dhe në adresën e përcaktuar nga autori.
Kutia me ekran, tela dhe pjesë elektronike
Sipas Policisë, ngjarja ndodhi rreth orës 14:30 të 2 tetorit, kur 21-vjeçari Engjell Karoshi dyshohet se, me një kapuç në kokë, vendosi në ambientet e karburantit në pronësi të Zija Shulkut një kuti pice.
Mbi kuti ndodheshin një ekran, pjesë elektronike dhe tela, duke krijuar dyshimin se bëhej fjalë për një pajisje shpërthyese të telekomanduar.
Bashkë me kutinë, autori kishte lënë edhe një letër kërcënuese, ku kërkonte 50 mijë euro.
“Eksplozivi do të shpërthejë nëse njoftoni Policinë”
Në letër pretendohej se kutia përmbante lëndë plasëse C4 dhe se ishte e pajisur me sensorë lëvizjeje dhe telekomandim.
21-vjeçari kërcënonte se pajisja do të shpërthente nëse shuma nuk paguhej brenda afatit të përcaktuar prej tij, nëse kutia do të lëvizte apo nëse do të njoftohej Policia ose persona të tjerë.
Pas mbërritjes së forcave speciale xheniere të RENEA-s, kutia u hap dhe u kontrollua. Nga verifikimi rezultoi se brenda saj nuk kishte lëndë shpërthyese.
U identifikua dhe u arrestua brenda pak orësh
Policia e Dibrës, në bashkëpunim me Sektorin për Hetimin e Krimeve të Rënda dhe shërbimet Operacionale në DVP Dibër, finalizoi operacionin e koduar “Kërcënimi”.
Si rezultat i hetimit, 21-vjeçari E. K. u identifikua, u kap dhe u arrestua në flagrancë brenda pak orësh nga ngjarja.
Ai dyshohet për veprën penale “Shtrëngimi me anë të kanosjes ose dhunës për dhënien e pasurisë”.
Hetimet vijojnë
Policia bëri të ditur se hetimet vijojnë për zbardhjen e plotë të rrethanave të ngjarjes dhe për të verifikuar nëse ka persona të tjerë të përfshirë.
Në kuadër të hetimeve pritet të verifikohen edhe rrethanat në të cilat është përgatitur pajisja e sajuar dhe mënyra e komunikimit me pronarin e karburantit.