Nëse SPAK nuk shkon te kumbari, hetimet janë thjesht kozmetikë momentale

Nënkryetari i PD-së, Belind Këlliçi, ka deklaruar se me shumë mundësi edhe biznesmeni Ron Yeffet, i cili ndodhet në lupën e drejtësisë, do t’i bashkohet Ergys Agasit.

Këlliçi thekson se sa më shumë bashkëpunëtorë të Ramës të dalin para ligjit, aq më shumë del në pah paprekshmëria dhe pandëshkueshmëria e kryeministrit Edi Rama.

Nënkryetari i PD-së nënvizon se Yeffet dhe Agasi morën pushtet dhe ushtruan ndikim të paligjshëm, vetëm prej marrëdhënies me Ramën.

Këlliçi thotë se SPAK-u nuk shkon te kumbari, gjithë hetimet e veprimet e tjera janë thjesht kozmetikë momentale.

“Edhe një koordinator tjetër i Edi Ramës për punët e pisëta, Ron Yeffet është nën lupën e drejtësisë dhe gjasat janë që ai t’i bashkohet Gysit të bandave.

Këto janë sigurisht hetime dhe masa të mirëpritura.

Por sa më shumë bashkëpunëtorë e miq të Edi Ramës të dalin para ligjit, aq më shumë del në pah paprekshmëria dhe pandëshkueshmëria e kreut të organizatës.

Roni i trafikut të armëve dhe projekteve strategjike, Gysi i AKSH-it dhe Hipotekave, morën pushtet dhe ushtruan ndikim të paligjshëm, VETËM prej marrëdhënies me Edi Ramën.

Është e qartë në sytë e gjithë shqiptarëve që nëse SPAK nuk shkon tek kumbari, gjithë hetimet e veprimet e tjera janë thjeshtë kozmetikë momentale!”, shkruan Këlliçi./ CNA