Kreu i PD-së, Sali Berisha, ka komentuar situatën politike dhe mënyrën se si duhet të vijojë aksioni opozitar, duke iu përgjigjur pyetjeve të ndjekësve në rrjetet sociale.

Ai u shpreh se bllokimi i instrumenteve të kontrollit parlamentar dhe, sipas tij, mohimi i të drejtave kushtetuese të deputetëve të opozitës, kërkojnë një rishikim të qëndrimeve të saj.

Berisha tha se, në kushtet e asaj që e cilësoi si shkelje të të drejtave të opozitës dhe përballë “morisë së skandaleve”, opozita duhet të rishqyrtojë të gjitha qëndrimet e saj.

Pyetje-përgjigje:

Flogert Merzira: Z. Berisha, ju keni thënë se bojkoti i parlamentit nuk është zgjidhje. Por kur opozitës i refuzohen apo i bllokohen instrumentet kryesorë të kontrollit parlamentar, deri ku duhet të shkojë aksioni politik i opozitës?

A mendoni se ka ardhur momenti për një përshkallëzim të fortë dhe të pandërprerë të aksionit opozitar brenda dhe jashtë parlamentit?

Sali Berisha: Jam plotësisht dakord me ju. Mohimi i të drejtave kushtetuese, shkelmimi i të drejtave kushtetuese të deputetëve të opozitës në parlament është bërë ligj dhe rregull.

Ndaj dhe, shoqëruar kjo me morinë e skandaleve, jam i mendimit se opozita duhet të rishqyrtojë të gjitha qëndrimet e saj.