Nuk iu bind Policisë dhe përplasi makinën e shërbimit, arrestohet 27-vjeçari i armatosur në Kurbin
Një 27-vjeçar është arrestuar në Kurbin, pasi u kap duke qarkulluar i armatosur dhe tentoi t’u largohej shërbimeve të Policisë.
Sipas uniformave blu, i riu përplasi automjetin e shërbimit dhe rrezikoi jetën e efektivëve, ndërsa gjatë ndjekjes hodhi edhe armën e zjarrit.
Ngjarja u finalizua në kuadër të operacionit policor të koduar “Target”. Gjatë ndërhyrjes, Policia sekuestroi një pistoletë, municion luftarak, automjetin dhe një palë targa.
NJOFTIMI:
Sektori për Krimet e Rënda, në bashkëpunim me Seksionin e Mbështetjes Operacionale në DVP Lezhë dhe Komisariatin e Policisë Kurbin, bazuar në informacionet e siguruara për një shtetas që qarkullonte i armatosur, organizuan dhe finalizuan operacionin policor të koduar “Target”, në kuadër të të cilit u arrestua shtetasi:
-E. Xh., 27 vjeç, banues në Mamurras, Kurbin.
Ky shtetas u lokalizua në qytetin e Mamurrasit, duke qarkulluar me automjet. Sapo ka parë shërbimet e Policisë, ka vijuar lëvizjen me shpejtësi, duke përplasur automjetin e shërbimeve të Policisë dhe duke rrezikuar jetën e punonjësve të Policisë, si dhe ka hedhur armën e zjarrit që mbante me vete.
Pas disa minutash ndjekjeje, në lagjen “Zef Hoti”, Mamurras, u bë e mundur kapja dhe vënia në pranga e 27-vjeçarit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme.
/vizionplus.tv
