Denoncimi i fortë: SHISH ka përgjuar të gjitha ambasadat dhe shërbimet e huaja në Shqipëri

Kreu i PD-së, Sali Berisha, ka bërë një deklaratë të fortë ku është shprehur se ka të dhëna të forta se SHISH ka përgjuar dhe survejuar të gjitha ambasadat dhe shërbimet e huaja në Shqipëri.

“SHISH i drejtuar nga Agasi jo vetëm që ka regjistruar, survejuar opozitën dhe kundërshtarët e saj, por ka të dhëna të plota që ka përgjuar zyrtarë, ministra, deputetë të partisë së krimit në pushtet dhe të gjitha ambasadat dhe shërbimet e huaja në Shqipëri. Ka të dhëna të plota duke shkelmuar në këtë mënyrë konventën e Vjenës, traktatet ndërkombëtare në të cilat Shqipëria është palë dhe këto do të dalin. I kemi denoncuar me kohë, i denoncojmë prapë sot. Të përgjosh shërbimet diplomatike në Shqipëri lëvizjet e të huajve në një vend aleat të NATO-s e bën vetëm për qëllime armiqësore ndaj këtyre vendeve duke kërcënuar sigurinë e tyre dhe personave të përgjuar dhe koha do t’i provojë këto dhe jo vonë”, tha Berisha./ CNA