Kryeministri i ngarkuar i Kosovës, Albin Kurti, ka pritur në Zyrën e Kryeministrit tre përfaqësues diplomatikë të vendeve aleate: të Ngarkuarën me Punë të Ambasadës së Shteteve të Bashkuara të Amerikës, Anu Prattipati, ambasadorin e Mbretërisë së Bashkuar, Jonathan Hargreaves, dhe ambasadorin e Republikës Federale të Gjermanisë, Rainer Rudolph.
Takimet, të zhvilluara në kuadër të kontakteve të rregullta me shtetet aleate, partnere dhe mike të Kosovës, u shoqëruan me urime për formimin e Qeverisë dhe mandatin e ri të Kurtit.
Të lidhura
None found
Gjatë bisedimeve u diskutua për marrëdhëniet dypalëshe të Kosovës me secilin prej këtyre vendeve, mundësitë për thellimin e mëtejshëm të bashkëpunimit, përparimin demokratik, zhvillimin e qëndrueshëm ekonomik dhe proceset integruese të Kosovës.
Kurti bëri të ditur se në takime u trajtuan edhe çështjet aktuale, me fokus të veçantë te nevoja për stabilitet institucional, sidomos pas rrethanave të krijuara më 16 shtator.
Kryeministri i ngarkuar shprehu mirënjohjen e Kosovës për mbështetjen e vazhdueshme dhe të palëkundur të Shteteve të Bashkuara të Amerikës, Mbretërisë së Bashkuar dhe Gjermanisë.
