Berisha: Në Strasburg ua shpjegova shumë qartë që SPAK nuk vepron ndaj Edi Ramës, sepse ai e ka në kontroll atë

Sali Berisha ka përsëritur akuzat e tij ndaj kryeministrit Edi Rama dhe SPAK, duke pretenduar se struktura e posaçme e drejtësisë nuk po vepron ndaj kreut të qeverisë.

Në bashkëbisedimin me ndjekësit, Berisha tha se gjatë takimeve në Strasburg u ka përcjellë bashkëbiseduesve të tij qëndrimin se ndryshimet në Kodin e Procedurës Penale, sipas tij, synojnë të mbrojnë Ramën dhe njerëzit e tij të afërt.

Kreu i PD-së përmendi disa dosje hetimore, për të cilat pretendoi se përmbajnë komunikime, urdhra apo të dhëna që lidhen me kryeministrin. Berisha deklaroi se në Strasburg ka shpjeguar, sipas tij, arsyet përse SPAK nuk po ndërmerr veprime ndaj Edi Ramës, duke pretenduar se kryeministri e kontrollon këtë strukturë.

Pyetje-përgjigje:

Artur Elezi: Si ka mundësi që SPAK shkon dhe mbledh telefonat e të gjithë ushtarëve dhe jo shefit të tyre, Edi Rama?

Sali Berisha: Pyetja është shumë e drejtë.

Unë po kthehem nga Strasburgu, dhe në takimet që zhvillova atje, garantova bashkëbiseduesit e mi se paketa ligjore e ndryshimeve të Kodit të Procedurës Penale është paketa me të cilën Edi Rama kërkon të mbrojë veten, familjen, vëllanë, ministrat e tij, pra organizatën e tij kriminale.

Sepse, ua bëra të qartë bashkëbiseduesve të mi, në dosjen Balluku 60% e dosjes është për Edi Ramën. Nga 6000 mesazhe në dosje, 4000 janë për Edi Ramën dhe të Edi Ramës.

Në dosjen e Ermal Beqirit janë urdhrat e Edi Ramës për regjistrimin e misioneve diplomatike në Shqipëri dhe të huajve të tjerë që kanë lëvizur në territor, regjistrimin e opozitës dhe regjistrimin e kundërshtarëve të tjerë politikë brenda partisë së tij.

Se në dosjen e Vlora Hysenit janë porositë më kriminale të Edi Ramës për të dhënë, për të transportuar, transferuar, sekretet më të mëdha të shtetit në duart e karteleve të drogës dhe armiqve të NATO-s dhe të Shqipërisë.

Se në dosjen e Lubi Ballukut, thashë, 60% e të gjithë dokumenteve janë për Edi Ramën.

Në dosjen e Erionit të Fikut, Ardi Veliut, janë të gjitha urdhra dhe ndarje parash të kontrabandës dhe parash të buxhetit me Edi Ramën.

Ndaj dhe ua shpjegova shumë qartë që SPAK nuk vepron ndaj Edi Ramës sepse ai e ka në kontroll atë.