Shqipëria pësoi një humbje 2-1 ndaj Finlandës në Helsinki, në një ndeshje që e nisi në mënyrën më të mirë të mundshme, por që ndryshoi rrjedhë pas daljes me karton të kuq të Etrit Berishës.
Kuqezinjtë kaluan në avantazh që në minutën e 4-t. Asllani ekzekutoi një goditje këndi dhe Rey Manaj u tregua i saktë me kokë, duke dërguar topin në rrjetë për 1-0.
Në minutën e 22-të, situata u komplikua ndjeshëm për Shqipërinë. Berisha kreu një ndërhyrje jashtë zone dhe u ndëshkua direkt me karton të kuq, duke lënë skuadrën me 10 lojtarë.
Vetëm tre minuta më vonë, trajneri u detyrua të bëjë edhe një zëvendësim, me Sherrin që hyri në portë në vend të Hoxhës.
Finlanda shfrytëzoi menjëherë epërsinë numerike dhe në minutën e 26-të barazoi rezultatin. Walta ekzekutoi një goditje dënimi rrafsh me tokën dhe mposhti Sherrin për 1-1.
Pjesa e parë u mbyll në barazim. Në fraksionin e dytë, Shqipëria tentoi të rezistonte dhe të kërkonte mundësinë për të kaluar sërish në avantazh.
Por në minutën e 71-të, Walta u shfaq sërish protagonist. Finlandezi ekzekutoi një tjetër goditje dënimi dhe e dërgoi topin në rrjetë, duke përmbysur rezultatin në 2-1.
Kuqezinjtë tentuan të reagonin në minutat e fundit. Uzuni kërkoi penallti pas një pengimi në zonë, por pas ndërhyrjes së VAR-it u vendos se nuk kishte 11-metërsh.
Finlanda ruajti avantazhin deri në fund dhe mori tre pikët në Helsinki.
Me këtë rezultat, Finlanda ngjitet në vendin e parë të grupit C1 me 7 pikë, ndërsa Shqipëria zbret në vendin e dytë me 6 pikë.