Eksperti i sigurisë Fatjon Softa ka ngritur pikëpyetje mbi deklarimin e kompozitorit Adi Hila se kamerat në studion e tij ishin vendosur për mbrojtjen e ambientit, pas incidenteve të mëparshme.
Hila ka deklaruar para oficerëve të policisë se pajisjet shërbenin për sigurinë e studios.
Ai ka pretenduar gjithashtu se pamjet intime që kanë qarkulluar në rrjet mund të jenë marrë pas një ndërhyrjeje në sistemin e kamerave.
Duke folur në emisionin “News24 Fundjavë”, Softa u ndal te pozicionimi i njërës prej kamerave, që, sipas tij, ishte e orientuar drejt krevatit.
Eksperti theksoi nevojën për të dalluar kamerat e sigurisë nga pajisjet e fshehta.
“Kamerat e sigurisë duhet të ndahen nga kamerat e fshehta. Këto të fundit vendosen për të mbledhur informacione në mënyrë të paligjshme. Në rastin e Adi Hilës, kamera ishte e orientuar drejt krevatit, jo drejt kasafortës, çka ngre dyshime mbi qëllimin e saj”, tha ai.
Softa e lidhi përmbajtjen e pamjeve me dyshimet mbi arsyen e vendosjes së pajisjeve.
“Fakti që kemi pamje filmike që kanë intimitet, tregon se qëllimi i vendosjes së kamerave ishte i ndryshëm nga ai i sigurisë”, shtoi eksperti.
Ky është vlerësimi i Softës, ndërsa qëllimi i vendosjes së kamerave dhe rrethanat e daljes së pamjeve mbeten për t’u sqaruar nga hetimi.
Eksperti komentoi edhe pretendimin për një hakerim të mundshëm. Sipas tij, duhet të verifikohet mënyra se si është aksesuar sistemi, nëse ka pasur ndërhyrje të paautorizuar dhe ku janë ruajtur regjistrimet.
Ai theksoi se kontrolli i sistemit të arkivimit dhe i aksesit në të është i nevojshëm për të përcaktuar se si pamjet kanë dalë nga studioja dhe kanë përfunduar në rrjet.
