SPAK ka zgjatur edhe me 3 muaj të tjerë hetimet për Aeroportin e Vlorës, që është shndërruar në një mollë sherri mes biznesmenit Behgjet Pacolli dhe qeverisë shqiptare.
Prokurorët e posaçëm argumentojnë se nevojiten hetime shtesë, e për këtë arsye i ka shtyrë hetimet deri më datë 23 nëntor 2026. Të dyshuar për akuzën e shkeljes së barazisë në tendera janë 7 anëtarë të komisionit të dhënies së koncesionit.
Nga dokumentet që kanë rrjedhur më herët nga SPAK, rezulton se ka dyshime për paracaktimin e konsorciumit fitues për ndërtimin e Aeroportit të Vlorës.
“Ka dyshime që anëtarët e komisionit të dhënies së koncesionit, në bashkëpunim me njëri-tjetrin, kanë favorizuar bashkimin e shoqërive Mabco Construction, Yda Group dhe 2A GROUP në kualifikimin dhe në shpalljen fituese të procedurës së koncesionit”, thuhet në dokumentet e SPAK.
Hetimet për këtë çështje nisën pas kallëzimit të kompanisë Al-De Corporation LTD, nëpërmjet shtetasit Aldi Çeli.
Përplasjet për aeroportin e Vlorës nisën fillimisht mes dy aksionerëve Behgjet Pacolli të Mabco dhe Valon Ademit të 2A GROUP.
Në kulmin e konflikteve mes palëve, qeveria njoftoi inicimin e procedurës për prishjen e koncesionit. Çështja ka përfunduar tashmë në Arbitrazh.
