Votohet në Bosnje e Hercegovinë, qytetarët akuzojnë politikanët

Në Bosnje e Hercegovinë u hapën të dielën qendrat e votimit për zgjedhjet e përgjithshme. Rreth 3.4 milionë votues po zgjedhin tre anëtarët e presidencës multietnike, ligjvënësit kombëtarë dhe liderët e dy entiteteve të vendit: Federatës me shumicë myslimane të Bosnje e Hercegovinës dhe të Republika Srpska, me shumicë serbe.

Ky sistem kompleks institucional u krijua përmes marrëveshjes së paqes të vitit 1995, e ndërmjetësuar nga Shtetet e Bashkuara, për të riparuar përçarjet mes myslimanëve boshnjakë, serbëve ortodoksë dhe kroatëve katolikë.

Raportime paraprake sugjerojnë se procesi u vonua në shumë qendra, për shkak të problemeve me sistemin digjital të votimit, që u prezantua si zgjidhje për shqetësimet për manipulimin e votave. Qendrat mbyllen në orën 19.

Zgjedhjet vijnë teksa shumë qytetarë në shtetin shumetnik të Ballkanit përballen me probleme të përditshme, ndërkohë që liderët politikë vijojnë me tensionet e epokës së luftës, që vazhdojnë ta mbajnë vendin të përçarë që prej konfliktit të viteve 1992-1995.

Për herë të parë, autoritetet po përdorin sistemin elektronik të identifikimit dhe skanimin e votës për të parandaluar parregullësitë dhe manipulimet e organizuara, të cilat minuan besimin qytetar tek zgjedhjet e mëparshme.

Pjesa dërrmuese e 75 partive në garë janë organizuar në baza etnike. Grupi boshnjak nacionalist, Partia për Veprimin Demokratik ka bërë fushatë për mbajtjen e Bosnjës së bashkuar kundër separatizmit serb, ndërsa shumë kroato-boshnjakë mbështesin partitë etnike si filialin e partisë qeverisëse në Kroaci, Unioni Demokratik Kroat.

Bakir Izetbegoviç, i biri i ish-liderit të boshnjakëve Alija Izetbegoviç, po kërkon një mandat të tretë si kryetar i qendrës së djathtë SDA, që është dhe partia më e madhe boshnjake në vend.

Por shumë qytetarë të zhgënjyer akuzojnë politikanët se përdorin nacionalizmin për të shmangur përballjen me problemet reale të shoqërisë, si standardet e jetesës dhe eksodin e të rinjve.

Gjithashtu, vendi mbetet i ndarë mes procesit të integrimit evropian, që ka mbetur i bllokuar prej kohësh dhe influencës së vazhdueshme të Rusisë.