Një 60-vjeçar i kërkuar nga drejtësia spanjolle është lokalizuar dhe arrestuar në Fier, ndërsa autoritetet kanë nisur procedurat për ekstradimin e tij.
M.T., banues në fshatin Bishan, u kap nga shërbimet e Komisariatit të Policisë Fier gjatë kontrolleve për identifikimin e personave të shpallur në kërkim ndërkombëtar. Arrestimi u krye në kuadër të operacionit të koduar “Gjurmimi”.
Ndaj 60-vjeçarit, Gjykata e Madridit kishte lëshuar një urdhër-arresti, pasi dyshohet se ka pasur rol në një grup kriminal të përfshirë në trafikun e lëndëve narkotike.
Përveç akuzës që lidhet me pjesëmarrjen në grup kriminal me qëllim trafikimin e drogës, autoritetet spanjolle e kërkojnë edhe për veprën penale të vjedhjes së energjisë elektrike.
Pas ndalimit në Fier, ndaj M.T. është vendosur arrestimi i përkohshëm, ndërsa hapi i radhës është procedura për dërgimin e tij në Spanjë.
Interpol Tirana dhe Interpol Madrid po vijojnë shkëmbimin e informacionit dhe veprimet procedurale për përfundimin e procesit të ekstradimit.
