Angelina Jolie ka publikuar në rrjetet sociale një seri imazhesh satelitore që tregojnë ndryshimet në disa zona të Gazës para dhe pas shkatërrimeve të shkaktuara nga lufta.
Aktorja dhe ish-e dërguara speciale e UNHCR-së ndau pamje nga Google Earth, duke u kërkuar ndjekësve të shohin nga afër shkallën e dëmtimit të ndërtesave dhe lagjeve në territor.
Lagje të tëra janë kthyer në rrënoja. Shtëpi, shkolla, universitete, spitale, rrugë dhe sisteme të ujit dhe kanalizimeve janë dëmtuar ose shkatërruar
-shkroi Jolie.
Në postimin e saj, ajo iu referua një analize satelitore të Kombeve të Bashkuara, sipas së cilës deri më 16 qershor 2026 ishin dëmtuar 82 për qind e strukturave në Gaza, ndërsa rreth dy të tretat e ndërtesave të dëmtuara vlerësoheshin si të shkatërruara.
Jolie theksoi gjithashtu nevojën për strehim dhe ndihma humanitare, duke thënë se rreth 1.98 milionë njerëz, ose 94 për qind e popullsisë së Gazës, kanë nevojë për strehim dhe produkte bazë ndërsa afrohet dimri. Sipas saj, hyrja e ndihmave dhe materialeve për strehim vazhdon të përballet me kufizime dhe vonesa.
Aktorja vuri në dukje se pamjet satelitore mund të tregojnë përmasat fizike të shkatërrimit, por nuk mund të pasqyrojnë humbjet njerëzore dhe jetën e familjeve që kanë mbijetuar.
Në fund të mesazhit, Jolie bëri thirrje që civilët të marrin strehim para dimrit, spitalet të pajisen me materiale mjekësore dhe të krijohen kushtet për rindërtimin e shtëpive, shkollave dhe komuniteteve.
Shkatërrimi është i dukshëm. Nevojat janë të njohura. Ajo që ka rëndësi tani është nëse ato do të përmbushen
-përfundoi ajo.
