Një 76-vjeçar ka humbur jetën pasditen e sotme në fshatin Greshicë të Mallakastrës, teksa po përpiqej të shuante një zjarr që kishte përfshirë një ullishte.
Viktima, Nazif Cenaj, dyshohet se kishte ndezur vetë zjarrin në tokën e tij për të djegur mbeturinat, por situata ka dalë jashtë kontrollit. Sipas të dhënave paraprake, 76-vjeçari ka hyrë në zonën e përfshirë nga flakët në përpjekje për t’i shuar ato, por nuk ka mundur të dalë.
Policia konfirmoi ngjarjen përmes një njoftimi zyrtar.
“Rreth orës 12:00, në fshatin Greshicë, Mallakastër, shtetasi N. C., 76 vjeç, dyshohet se ka ndezur zjarr në tokën e tij, për të djegur mbeturinat. Më pas, në përpjekje për të shuar flakët, ky shtetas ka humbur jetën”, njofton Policia.
Në vendngjarje kanë shkuar forcat zjarrfikëse dhe shërbimet e Policisë, ndërsa grupi hetimor po punon për sqarimin dhe dokumentimin e plotë të rrethanave të ngjarjes.
Kjo është viktima e parë e raportuar nga zjarret në këtë zonë.