Rusia godet Kievin gjatë vizitës së kancelarit Merz

Rusia goditi një tjetër urë të rëndësishme në Kiev të dielën, pak pasi kancelari gjerman mbërriti për një vizitë të papritur për të treguar mbështetjen evropiane përballë shtimit të sulmeve.

Sirenat e alarmit ajror ranë vazhdimisht në kryeqytetin ukrainas gjatë gjithë mëngjesit, përfshirë momentin kur Friedrich Merz u takua me Presidentin Volodymyr Zelensky në Akademinë Kombëtare të Shkencave, e cila ishte goditur nga një dron sulmues rus të hënën.

Zelensky i tha atij se njerëzit në Kiev po përjetonin "netë dhe ditë të tmerrshme" për shkak të sulmeve të pandërprera dhe i quajti kundërshtarët rusë të Ukrainës "barbarë të vërtetë".

"Këtu mund ta shohim gjithë kotësinë e kësaj lufte. Këto sulme barbare ndaj popullsisë civile të Ukrainës duhet të ndalen. Këto janë krime lufte që po kryhen çdo ditë këtu" vuri në dukje Merz.

Një valë sulmesh të pandërprera ka goditur zona banimi, pika karburanti, shkolla, si dhe infrastrukturën hekurudhore dhe të komunikimit, ndërsa sirenat e alarmit ajror që bien pothuajse vazhdimisht prishin jetën e përditshme dhe krijojnë ankth te njerëzit.

Me të mbërritur, Merz tha se Ukraina ka nevojë për gjithë mbështetjen e Gjermanisë në javët në vijim.

"Nëse Rusia nuk ndalet, makineria e saj e luftës herët a vonë do të kthehet kundër nesh," shtoi Merz. 

Ukraina kërkon më shumë mbështetje ushtarake perëndimore, përfshirë sisteme të avancuara përgjimi për të rrëzuar dronët e rinj rusë me shpejtësi të lartë dhe me motor reaktiv./CNA