Gjykata e Apelit në Kinë ka rrëzuar dënimin me vdekje për shqiptarin Klaudio Kanani, i akuzuar për trafik droge, duke lënë në fuqi dënimin me 25 vite burg.
Top Channel ka siguruar pamje ku shfaqet i riu nga Tepelena, i cili ndodhet në një burg në Guangzhou dhe i bën apel shtetit shqiptar që ta ndihmojë për transferimin e tij në Shqipëri për të vuajtur këtu pjesën e mbetur të dënimit.
“Mos u bëni merak, jam mirë më shëndet. Më ka marrë malli për juve. Unë këtu jam mirë por normal si në burg. Juve mos u shqetësoni për asnjë gjë sepse unë nuk është se kam probleme jam mirë”, thotë i riu me origjinë nga Tepelena.
Ai shpreson e apelon tek shteti shqiptarë për ti mundësuar transferimin e vuajtur dënimin në një burg në vendin tonë.
Gjykata e Apelit në provincën Guandong në Kinë ka rrëzuar kërkesën e prokurorisë për ta ndëshkuar Klaudion me dënimin kapital, pasi është akuzuar në shtetin komunist për trafik droge.
Një zëdhënës i kësaj gjykate i pohoi gazetarit të Top Channel Muhamed Veliu, se disa ditë më parë, në qendrën paraburgimit në Guangzhou, një gjykatës i ka komunikuar Klaudio Kananit vendimin e apelit.
“Apeli ka rrëzuar kërkesa e prokurorisë për dënim kapital dhe është lënë në fuqi vendimi i Qershorit 2025 më shkallën e parë, duke e dënuar me 25 vite burg pasi ai u gjet fajtor për trafikun e 1 ton droge të nisur nga Hong Kongu”, pohoi zëdhënësi i kësaj gjykate.
Për dy shtetas kinez të bashkakuzuar me shqiptarin Klaudio Kanani gjykata vendosi ekzekutim me varje ndërsa për dy të tjerë pushkatim përpara publikut.
Siç edhe Top Channel e ka raportuar ekskluzivisht këtë rast vitin e shkuar, Klaudio Kanani, shpëtoi nga dënimi kapital pas një mori përpjekjesh diplomatike të ministrit të atëhershëm për punët e jashtme Igli Hasani, i cili për këtë çështje zhvilloi disa takime me ambasadorin e Kinës në Tiranë.
Sikurse përfshirja e ministrit të atëhershëm të drejtësisë Ulsi Manja dhe ambasadorit tonë në Kinë, Riza Poda.
Kontaktuar nga Top Channel familja e Klaudio Kananit, shprehu mirënjohje se çfarë është bërë deri më tani nga shteti shqiptarë për djalin tyre.
Ata kërkojnë një përpjekje të fundit nga ministrat Ferit Hoxha dhe Toni Gogu për të çuar përpara bazuar në marrëveshjen e reciprocitetit me Kinën, nisjen e proceduarve për ta transferuar Klaudio Kananit nga Kina, e vuajtur dënimin në Shqipëri tashmë që edhe Gjykata e Apelit e dha vendim e saj.
