Kuvendi i Kosovës shqyrton sot ndryshimet për Specialen

Kuvendi i Kosovës do të mbajë sot seancë të jashtëzakonshme, ku në pikën e parë të rendit të ditës do të shqyrtohet Projektligji për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar.

Seanca është paraparë të nisë në orën 09:00. Para saj, në orën 08:00, do të mblidhet Komisioni për Legjislacion, i cili do të shqyrtojë projektligjin dhe aspektet juridike të tij, përfshirë përputhshmërinë me Kushtetutën, legjislacionin në fuqi dhe procedurat e Kuvendit.

Projektligji parasheh ndryshimin dhe plotësimin e Ligjit Nr. 05/L-053 për Dhomat e Specializuara dhe Zyrën e Prokurorit të Specializuar.

Qeveria e Kosovës, të premten, i hapi rrugë procedimit të nismës për ndryshimin e këtij ligji, duke konstatuar se nuk ka pengesa ligjore për procedimin e projektligjit në Kuvend.

Nisma për ndryshimin e Ligjit për Dhomat e Specializuara është propozuar nga Partia Demokratike e Kosovës.

Zhvillimet nga mbledhja e Komisionit për Legjislacion dhe seanca e jashtëzakonshme e Kuvendit pritet të ndiqen gjatë gjithë ditës.