Studentët në të gjithë vendin nisën sot vitin e ri akademik 2026-2027, ku mbi 20 mijë prej tyre ulen për herë të pa...
BOTA
FBI arreston 34-vjeçaren, dyshohet se spiunonte për Kinën djalin e presidentit të Tajvanit
PiranjatPërditësimi i fundit 5 Tetor 2026, 09:54
Një grua 34-vjeçare nga Kalifornia është arrestuar nga FBI-ja në Aeroportin Ndërkombëtar të Los Anxhelosit, ndërsa po përgatitej të udhëtonte drejt Shangait, nën akuzën se ka vepruar si agjente e padeklaruar e qeverisë kineze.
Wanying “Heather” Zhang, banore e Irvine, dyshohet se ka kryer një operacion mbikëqyrjeje në Seattle, në vitin 2025, ndaj Lai Ting-yu, djalit të presidentit të Tajvanit, Lai Ching-te, i cili jeton në Shtetet e Bashkuara.
Sipas aktakuzës federale, Zhang udhëtoi drejt Seattle me një bashkëpunëtor, pas udhëzimeve që dyshohet se kishte marrë nga zyrtarë kinezë. Gjatë qëndrimit atje, ajo dhe bashkëpunëtori i saj dyshohet se fotografuan dhe filmuan banesën dhe familjarët e Lai Ting-yu, ndërsa regjistruan edhe targat e automjeteve.
Autoritetet amerikane pretendojnë se materialet e mbledhura iu përcollën më pas zyrtarëve kinezë. Hetuesit dyshojnë gjithashtu se Zhang përdori metoda për të shmangur zbulimin gjatë kryerjes së operacionit.
Sipas aktakuzës, hetuesit kanë identifikuar komunikime mes Zhang dhe të paktën dy personave që dyshohet se punonin për qeverinë kineze.
Autoritetet amerikane thonë se Zhang mori udhëzime për operacionin gjatë një udhëtimi në Kinë dhe më pas organizoi mbikëqyrjen në Seattle.
FBI-ja vlerëson se të dhënat mbi vendndodhjen dhe lëvizjet e familjarëve të afërt të zyrtarëve të lartë tajvanezë mund të kenë rëndësi për Pekinin, veçanërisht në rast të një krize të ardhshme që lidhet me Tajvanin.
Arrestimi u njoftua nga prokurori i parë federal për Distriktin Qendror të Kalifornisë, Bill Essayli, i cili theksoi se Zhang konsiderohet e pafajshme deri në një vendim përfundimtar të gjykatës.
“Wanying Zhang, e njohur edhe si Heather, 34 vjeç, nga Irvine, u arrestua sot nga FBI-ja në Los Anxhelos me një padi federale që e akuzon për veprim si agjente e paregjistruar e Republikës Popullore të Kinës”, deklaroi Essayli.
Zhang pritet të dalë para gjykatës federale në Los Anxhelos për seancën e saj të parë.
Deri tani nuk dihet nëse ajo ka caktuar një avokat për ta përfaqësuar. Ndërkohë, nuk ka pasur një reagim zyrtar nga Pekini lidhur me akuzat amerikane.
