SHBA kryen sulm të ri ndaj një anijeje të dyshuar për trafik droge në Karaibe, 4 të vrarë

Katër persona janë vrarë në një sulm të forcave amerikane ndaj një anijeje të dyshuar për trafik droge në Karaibe, njoftoi Komanda Jugore e SHBA-së (SOUTHCOM).

Sipas deklaratës së publikuar nga komanda në rrjetin social X, Task Forca e Përbashkët për Hemisferën Perëndimore kreu një “sulm vdekjeprurës kinetik” ndaj një anijeje me shpejtësi të lartë, e cila po lëvizte përgjatë rrugëve të njohura të trafikut të narkotikëve në Karaibe.

“Informacionet e konfirmuara treguan se anija ishte e përfshirë në mënyrë aktive në kontrabandën e narkotikëve. Katër narko-terroristë u vranë në këtë operacion”, thuhet në njoftimin e SOUTHCOM.

Sulmi është pjesë e fushatës së administratës së Presidentit të SHBA-së, Donald Trump, kundër trafikut të drogës, e cila ka nisur vitin e kaluar.

Sipas të dhënave të autoriteteve amerikane, më shumë se 220 persona janë vrarë që nga fillimi i kësaj fushate, të zhvilluar në kuadër të operacionit “Shtiza Jugore”. Operacionet amerikane kanë në shënjestër anije në Karaibe dhe në Paqësorin Lindor, të cilat, sipas inteligjencës amerikane, dyshohet se transportojnë lëndë narkotike.