Alarm për murtajën në Rusi, rreth 200 persona nën vëzhgim pas vdekjes së një studiueseje

Masa është marrë pas sëmundjes së një punonjëseje të një instituti kërkimor kundër murtajës në Irkutsk. Sipas deklaratave të Alexei Tsydenov, kreut të Republikës së Buryatias, gruaja ka ndërruar jetë nga një formë e paspecifikuar e murtajës.

Megjithatë, autoriteti rus për mbikëqyrjen shëndetësore, Rospotrebnadzor, deklaroi të dielën se punonjësja ishte diagnostikuar me “pneumoni me etiologji të panjohur” dhe se situata sanitare dhe epidemiologjike në rajonin e Irkutskut, si dhe në qytetet Irkutsk dhe Shelekhov, mbetet e qëndrueshme.

Autoritetet thanë gjithashtu se testimet e zgjeruara nuk kanë zbuluar mikroorganizma të lidhur me punën e saj në institut.

Raportimet për rastin nisën të premten, kur mediat lokale njoftuan se një punonjëse 27-vjeçare e institutit ishte sëmurë me dyshimin për murtajë pneumonike, pasi ishte kthyer nga një udhëtim pune në Buryatia. Atje ishte raportuar më herët një shpërthim pranë kufirit me Mongolinë.

Ndërkohë, sipas Axios, Shtëpia e Bardhë po monitoron raportimet për rastin e dyshuar dhe masat e karantinës në Rusi. Një zyrtar i administratës Trump tha se autoritetet amerikane janë në dijeni të situatës, po e monitorojnë atë dhe po vlerësojnë masat e mundshme.

Ministritë ruse dhe të Moskës për Shëndetësinë, Organizata Botërore e Shëndetësisë (OBSH) dhe Departamenti Amerikan i Shtetit nuk kanë dhënë ende një koment zyrtar për raportimet.

Deri tani, autoritetet ruse nuk kanë konfirmuar një shpërthim të murtajës në Irkutsk, ndërsa informacionet për shkakun e vdekjes së punonjëses mbeten kontradiktore.

Top Channel