Goditet lokali ku organizoheshin lojëra fati, arrestohen 2 persona në Fier 16 të proceduar

Policia e Fierit ka finalizuar operacionin e koduar “No Games”, në kuadër të kontrolleve për parandalimin dhe goditjen e veprimtarisë së kundërligjshme të lojërave të fatit.

Gjatë operacionit është zbuluar një ambient i përshtatur për zhvillimin e lojërave të fatit në një lokal në lagjen “Kastriot”, në qytetin e Fierit. Për këtë rast janë arrestuar në flagrancë dy persona, ndërsa 16 të tjerë janë proceduar penalisht në gjendje të lirë.

Operacioni u zhvillua nga shërbimet e Komisariatit të Policisë Fier, në bashkëpunim me shërbimet e Forcës së Posaçme “Shqiponja” të DVP Fier, pas informacioneve të siguruara në rrugë operative se në një lokal në qytet zhvillohej në mënyrë të kundërligjshme veprimtaria e lojërave të fatit.

Gjatë ndërhyrjes në lokal, i marrë me qira dhe i administruar nga shtetasja Dh. Sh., 49 vjeçe, banues në Fier, shërbimet e Policisë zbuluan një dhomë të përshtatur për zhvillimin e lojërave të fatit. Sipas Policisë, aktiviteti organizohej nga shtetasi R. C., 43 vjeç, banues në Tiranë.

Në momentin e ndërhyrjes, në ambient u kapën në flagrancë 16 shtetas, të cilët po luanin lojëra fati.

Në vijim të veprimeve procedurale, u arrestuan në flagrancë shtetasit R. C., 43 vjeç, dhe Dh. Sh., 49 vjeçe.

Ndërkohë, u proceduan në gjendje të lirë shtetasit K. Ç., 38 vjeç, D. K., 44 vjeç, A. V., 39 vjeç, K. H., 45 vjeç, L. M., 42 vjeç, F. A., 59 vjeç, A. I., 37 vjeç, O. M., 37 vjeç, K. H., 49 vjeç, D. V., 46 vjeç, E. B., 40 vjeç, D. V. (T.), 31 vjeç, L. Xh., 39 vjeç, V. T., 35 vjeç, F. P., 41 vjeç, dhe S. D., 28 vjeç, banues në Fier, Tiranë, Durrës, Korçë dhe Berat.

Gjatë kontrollit në lokal, Policia sekuestroi në cilësinë e provës materiale:

1 tavolinë pokeri;

1 kuti me 500 çipsa;

6 pako me letra bixhozi;

5 celularë;

8 000 euro.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Fier, për veprime të mëtejshme.