Kongo, të paktën 30 të vdekur dhe dhjetëra të zhdukur pas përplasjes së varkave

Dy varka u përplasën gjatë fundjavës në lumin Kongo, duke lënë të paktën 30 të vdekur dhe dhjetëra të zhdukur, njoftuan sot autoritetet lokale.

Varkat me motor prej druri u përplasën me njëra-tjetrën të dielën në mbrëmje pranë zonës Ngombe-Lukolela, në provincën Equateur, sipas Ministrit të Brendshëm provincial, Crispin Butou.

Shkaku i përplasjes nuk është bërë menjëherë i qartë. Butu tha se lundrimi natën ka shkaktuar shumë aksidente në të kaluarën. Ministri i tha Associated Press se 30 personat e vrarë në përplasje janë varrosur tashmë.

Njëra varkë po udhëtonte nga Ubangi, në veriperëndim, drejt kryeqytetit Kinshasa, dhe tjetra nga Kinshasa drejt Lukolela – pranë vendit të përplasjes – tha Butu, duke shtuar se kërkimet po vazhdonin për të identifikuar më shumë viktima dhe të mbijetuar .

Një anëtar i forcave të sigurisë, i cili tha se e pa përplasjen nga bregu i lumit, i tha AP-së se anija “që po kthehej nga Ubangi ishte e mbingarkuar me mallra dhe u përplas me atë që vinte nga Kinshasa”. “Pothuajse të gjithë pasagjerët mbetën të bllokuar nën ujë dhe vetë anija u fundos”, shtoi ai, duke folur në kushte anonimiteti sepse nuk ishte i autorizuar të bënte deklarata publike pa lejen e eprorëve të tij.

Tragjeditë vdekjeprurëse detare janë të zakonshme në vendin e Afrikës Qendrore, me lundrime natën dhe anije të mbipopulluara që shpesh përmenden si shkaqe. Standardet e dobëta të sigurisë dhe mungesa e infrastrukturës në zonat e largëta të vendit kanë kontribuar gjithashtu në numrin e lartë të viktimave në aksidentet detare në vitet e fundit.

Në korrik, një varkë druri që transportonte studentë pas dhënies së provimeve shtetërore u fundos në pjesën qendrore të vendit, duke vrarë të paktën 20 persona. Varka po udhëtonte në provincën Kasai kur u fundos teksa po hynte në bashkimin e lumenjve Sankuru dhe Kasai.