Nisja e vitit të ri akademik/ Mesazhi i rektorit të Universitetit të Arteve

Rektori i Universitetit të Arteve, Erald Bakalli, u ka uruar studentëve vitin e ri akademik.

Në mesazhin e tij, Bakalli thekson se Universiteti i Arteve do të vazhdojë të punojë për krijimin e kushteve sa më të mira për formimin artistik, akademik dhe profesional të studentëve.

"Kam kënaqësinë t’ju uroj, në emër të Universitetit të Arteve, mirëseardhjen në fillimin e një viti të ri akademik 2026-2027. Është një kënaqësi e veçantë të kemi sot së bashku një komunitet të përbërë nga studentë, pedagogë dhe profesionistë të artit, të bashkuar nga pasioni për dijen, krijimtarinë dhe kulturën.

Një përshëndetje të veçantë u drejtoj studentëve të rinj, të cilët sot nisin një etapë të rëndësishme të formimit të tyre akademik dhe artistik. Zgjedhja për të studiuar në Universitetin e Arteve përfaqëson jo vetëm një hap të rëndësishëm në zhvillimin tuaj profesional, por edhe një mundësi për të kultivuar talentin, individualitetin dhe vizionin tuaj krijues.

Studentëve që rikthehen në auditorët e universitetit, ju uroj një tjetër vit të suksesshëm, të pasur me dije, përvoja të reja dhe arritje. Çdo vit akademik sjell sfida të reja, por edhe mundësi të reja për t’u zhvilluar dhe për të përmbushur objektivat tuaja.

Universiteti i Arteve ka për detyrë të krijojë një mjedis ku arti, arsimi dhe kërkimi zhvillohen në mënyrë të pandashme. Këtu, talenti duhet të shoqërohet me përkushtim, disiplinë dhe punë të vazhdueshme. Ju inkurajoj të shfrytëzoni çdo mundësi që ju ofrohet, të bashkëpunoni me njëri-tjetrin dhe të jeni të hapur ndaj ideve dhe perspektivave të reja.

Në këtë fillim viti akademik, dëshiroj t’ju siguroj se Universiteti i Arteve do të vazhdojë të punojë për krijimin e kushteve sa më të mira për formimin tuaj artistik, akademik dhe profesional. Suksesi i universitetit është i lidhur ngushtë me suksesin dhe përparimin e studentëve të tij.

Le ta nisim këtë vit me përgjegjësi, motivim dhe besim në potencialin tonë. Uroj që muajt që kemi përpara të jenë të mbushur me punë të frytshme, krijimtari, bashkëpunim dhe rezultate të merituara.

Në përfundim studentë dhe kolegë, ju uroj një vit akademik të mbarë dhe të suksesshëm", shprehet Bakalli/ CNA