Oqeanet e botës thithën një sasi rekord prej 23 zettaxhaulësh energji termike gjatë vitit 2025, një tregues i përshpejtimit të ngrohjes globale dhe ndryshimeve që po pëson sistemi klimatik i Tokës. Shifra është rreth 40 herë më e madhe se e gjithë energjia e përdorur nga njerëzimi gjatë atij viti.

Të dhënat vijnë nga raporti i dhjetë i Copernicus për gjendjen e oqeaneve, i cili tregon se detet po bëhen njëkohësisht më të nxehta, më të larta dhe më acide.

Sipas raportit, niveli i deteve është rritur mesatarisht me rreth 3.8 milimetra në vit që nga viti 1999, ndërsa ritmi është përshpejtuar në 4.2 milimetra në vit gjatë periudhës 2012–2025. Në të njëjtën kohë, aciditeti global i oqeaneve është rritur me 17% në 40 vitet e fundit.

Oqeanet kanë thithur rreth 90% të nxehtësisë shtesë të bllokuar në sistemin e Tokës nga gazrat serrë dhe rreth një të tretën e dioksidit të karbonit të emetuar nga aktiviteti njerëzor. Shkencëtarët paralajmërojnë se rritja e temperaturave po prek drejtpërdrejt ekosistemet detare.

Një nga pasojat është dëmtimi i shkëmbinjve koralorë. Sipas raportit, 84% e shkëmbinjve koralorë në botë përjetuan stres termik në nivele që shkaktojnë zbardhjen e koraleve gjatë periudhës janar 2023–shtator 2025.

Situata është veçanërisht shqetësuese në Europë. Deti Mesdhe është ngrohur me rreth 0.32°C për dekadë, ndërsa valët e të nxehtit detar janë bërë më të shpeshta dhe më të gjata. Në disa raste, temperaturat e larta kanë zgjatur për më shumë se një muaj dhe janë shtrirë edhe në thellësi të detit.

Të dhënat e një studimi shkencor të publikuar në vitin 2026 konfirmojnë gjithashtu se përmbajtja e nxehtësisë në 2 mijë metrat e sipërm të oqeaneve u rrit me rreth 23 zettaxhaulë në 2025, duke shënuar një tjetër rekord.