Rey Manaj: Ndeshje e lehtë me San Marinon, por varet si futemi në fushë

Sulmuesi i Kombëtares Shqiptare, Rey Manaj, u shfaq besimplotë në konferencën për shtyp përpara përballjes me San Marinon.

Lojtari kuqezi nënvizoi se fitorja varet nga qasja dhe përqendrimi i skuadrës që nga sekonda e parë e takimit. Ai kërkoi zhbllokim të shpejtë të rezultatit për të shmangur vështirësitë e provuara më parë ndaj kundërshtarëve defensivë.

Manaj vlerësoi atmosferën pozitive në grup, duke theksuar se të gjithë futbollistët vendosin interesat e ekipit përpara objektivave personalë.

“Ndeshjen me San Marinon varet si e marrim. Është një kundërshtar i lehtë, por varet si do futemi në fushë. Pas ndeshjes në Finlandë, është ndeshje e lehtë. Ne do futemi që na fillimi për ta mbyllur ndeshjen dhe për të marrë fitoren.

Për ne kryesore është të shënojmë. Nuk ka rëndësi nëse vjen nga goditjet standarde apo me aksion. Rëndësi ka të shënojmë dhe të fitojmë. Të gjithë lojtarët e ndjekin trajnerin. Tani çdo kohë që kalon është më mirë për ne. Shpresoj të jemi në maksimum për ndeshjet kualifikuese të Europianit.

Besoj se sa më shumë gola të bëjmë, do jemi më të lumtur. Duhet të futemi në fushë fort dhe të mendojmë nga fillimi për të zhbllokuar. E kemi parë me Andorrën, ekip më i dobët se ne, por shënuam vonë. Shpresojmë të shënojmë më shumë se ekipet e tjera.

Me të gjithë lojtarët loja shkon mirë. Grupi është shumë i mirë dhe është përmirësuar. Çdo lojtar që zgjedh trajneri, mendon për ekipin para gjërave personale.

Dëshira do ishte e madhe ta thyej rekordin e golave këtë ndeshje. Megjithatë, rëndësi ka që ekipi të fitojë. Vitin e fundit kam bërë 5 gola. Në të kaluarën nuk kam qenë stabël, edhe për shkak dëmtimesh. Gjërat po shkojnë mirë tani.”, deklaroi Manaj.