Një rast i denoncuar si mashtrim dhe kërcënim është bërë publik nga emisioni investigativ “Fiks Fare”, ku një qytetar nga Elbasani pretendon se kushëriri i tij i ka marrë 2.8 milionë lekë të vjetra dhe prej disa vitesh nuk ia ka kthyer.
Sipas qytetarit, shuma i është dhënë kushëririt pasi ky i fundit i ka thënë se kishte nevojë për paratë për shkak të një halli. Nga shuma totale, ai thotë se i janë kthyer vetëm 400 mijë lekë të vjetra.
“Nga këto na ka kthyer 400 mijë dhe tani na mashtron. Kemi pasur debate të forta dhe vazhdon prapë. Shumën na e ka marrë gjoja kishte hall”, është shprehur ai.
Qytetari pretendon se përpjekjet për të marrë paratë kanë vijuar prej vitesh, ndërsa situata mes dy kushërinjve është përshkallëzuar edhe në debate.
“Tani më ngre tonet, kemi bërë debat nëpërmjet telefonit. E kam takuar personalisht dhe më thotë jo për 6 muaj e 1 vit. Deri tani s’kemi bërë denoncim sepse Fiksi i zgjidh këto gjërat”, ka deklaruar ai.
Sipas tij, familja jeton në Elbasan, ndërsa kushëriri ndodhet në Marikaj. Ai tregon se ka shkuar edhe në Marikaj për ta takuar, por pa mundur të zgjidhë situatën.
“Sa herë e kontaktojmë, i njëjti avaz. Mashtrime dhe trillime. Kemi shkuar edhe në Marikaj. Debatet i kemi bërë me fjalë, mashtrime e maskara. Fillon e bërtet”, rrëfen qytetari.
Pas ankesës, qytetari e ka telefonuar disa herë kushëririn. Në një prej telefonatave, sipas materialit të publikuar nga “Fiks Fare”, ai e pranon se ka një borxh ndaj tij, por shprehet se nuk ka mundësi t’i kthejë paratë.
“S’kam, ku t’i gjej. Më lekë borxh njerëzit dhe s’po mbledh. Rri pa bukë thua ti”, dëgjohet të thotë ai.
Në vijim të telefonatës, sipas denoncimit, situata përshkallëzohet dhe kushëriri e kërcënon.
“Mbylle, me mua je hasëm. Me mua je hasëm. Pushka t’u bëftë top për mua. Unë e kam thënë duro. Meqë s’do sqarim, mirupafshim”, shprehet ai, ndërsa i kërkon kushëririt që ta denoncojë çështjen në prokurori.
Pas kësaj, qytetari ka shkuar sërish në Marikaj për ta takuar, por pretendon se nuk ka mundur ta gjejë. Sipas tij, kushëriri i shmanget takimeve dhe nuk pranon të përballet me të për të zgjidhur çështjen e borxhit.
Rasti është bërë publik përmes emisionit “Fiks Fare”, ndërsa nga materialet e paraqitura nuk bëhet e ditur nëse për këtë çështje është bërë një kallëzim zyrtar në organet ligjzbatuese.