Një video e mbërritur në redaksinë e JOQ Albania ngre dyshime për një rast të mundshëm ryshfeti gjatë një ndalimi rrugor në Sarandë.
Në pamje shihet një Porsche Cayenne e zezë, e ndaluar në anë të rrugës dhe e rrethuar nga disa efektivë të Policisë Rrugore.
Në një moment, drejtuesi i mjetit zgjat dorën nga dritarja dhe i kalon një kartëmonedhë efektivit që ndodhet pranë tij. Momenti është evidentuar edhe me një rreth të kuq në video.
Menjëherë pas shkëmbimit, efektivi largohet nga automjeti, ndërsa efektivët e tjerë vijojnë të qëndrojnë pranë mjetit dhe të komunikojnë me drejtuesin.
Në pamjet e dërguara nuk dallohet ndonjë fletë-gjobë apo procedurë tjetër formale që të shpjegojë kalimin e parave.
Qytetari që ka dërguar videon pretendon se bëhet fjalë për ryshfet dhe kërkon që rasti të verifikohet nga institucionet përgjegjëse.
Nga pamjet mund të shihet momenti i kalimit të kartëmonedhës, por rrethanat dhe qëllimi i këtij shkëmbimi mbeten për t’u sqaruar zyrtarisht.
JOQ Albania publikon pamjet dhe pret reagimin e institucioneve përgjegjëse për të sqaruar se çfarë ka ndodhur gjatë këtij kontrolli rrugor në Sarandë.
