Geoffrey Archer, shkrimtari britanik me një nga sukseset më të mëdha tregtare në letërsi dhe ish-zyrtar i Partisë Konservatore, ka vdekur në moshën 86-vjeçare.
Shtëpia botuese HarperCollins bëri të ditur se Archer u nda nga jeta “papritmas dhe në paqe” në banesën e tij. Romani i tij i fundit, “Adami dhe Eva”, pritet të dalë në treg më vonë gjatë muajit tetor.
Të lidhura
None found
Edhe në ditët e fundit, autori vijoi angazhimet publike. Të dielën ai mori pjesë në një takim me lexues në Londër, ku foli për veprën e re, e cila pritet të publikohet në tetor.
Giles Brandreth, prezantues dhe autor i pranishëm në këtë aktivitet, tregoi se Archer ishte në gjendje shumë të mirë shpirtërore. Sipas tij, shkrimtari kishte bërë të ditur se “Adami dhe Eva” do të ishte libri i tij i fundit.
Archer ndërtoi një emër të rëndësishëm edhe në politikë. Ai shërbeu për pesë vjet si deputet konservator dhe më pas mbajti postin e zëvendëskryetarit të Partisë Konservatore. Në mesin e viteve 1980, ai ishte zyrtar i lartë në administratën e kryeministres Margaret Thatcher.
Megjithatë, suksesi i tij më i madh lidhej me letërsinë. Veprat e Archer janë shitur në më shumë se 300 milionë kopje në mbarë botën. Mes librave të tij më të njohur janë “Not a Penny More, Not a Penny Less” dhe “Kane & Abel”. Në vitin 1992, ai u emërua anëtar i përjetshëm i Dhomës së Lordëve.
Dënimi që i dha fund karrierës politike
Rruga politike e Archer u ndërpre rëndë në vitin 2001, kur ai u shpall fajtor për dëshmi të rreme dhe pengim të drejtësisë, çka solli edhe dërgimin e tij në burg.
Procedimi penal kishte lidhje me një padi për shpifje të ngritur prej tij ndaj gazetës “The Star” në vitin 1988. Në atë gjyq, Archer kishte përfituar 500 mijë paund si kompensim, por më vonë gjykata konstatoi se ai kishte gënjyer gjatë procesit.
Gjykata e dënoi me katër vjet burg, ndërsa lirimi i tij ndodhi në vitin 2003. Pas kësaj, Archer u rikthye në Dhomën e Lordëve dhe qëndroi atje deri në pensionimin e tij në vitin 2024.
Liderja e Partisë Konservatore, Kemi Badenoch, shprehu tronditjen e saj të thellë për vdekjen e shkrimtarit. Ajo tha se kishte marrë një mesazh prej tij vetëm të hënën në mëngjes.
Homazhe për Archer përcolli edhe ish-ministri konservator Nadim Zahawi, i cili e përshkroi atë si një “njeri të jashtëzakonshëm” dhe vlerësoi aftësinë e tij për të sjellë rrëfim, humor dhe energji.
Kate Elton, botuesja e Archer dhe drejtoreshë ekzekutive e HarperCollins UK, deklaroi se bashkëpunimi me të kishte qenë ndër përvojat më të rëndësishme të karrierës së saj. Ajo e cilësoi shkrimtarin si jashtëzakonisht të përkushtuar dhe si një bashkëpunëtor “ëndrrash” për çdo botues.
