Veteranët e UÇK organizojnë sot protestë në sheshin e Prishtinës

Organizata e Veteranëve të Luftës së Ushtrisë Çlirimtare të Kosovës (OVL-UÇK) bën thirrje për pjesëmarrje sot në sheshin e Prishtinës, me kërkesën për miratimin e Projektligjit me ndryshime të Ligjit për Gjykatën Speciale.

Sipas njoftimit, OVL-UÇK u ka bërë thirrje kategorive të dala nga lufta e UÇK-së dhe qytetarëve që të mblidhen në sheshin e Prishtinës, duke theksuar se duhet të jenë të bashkuar dhe me dinjitet.

“Të bashkuar dhe me dinjitet, për të mbrojtur atë që është e jona dhe për të dëshmuar se UÇK-ja na bashkon”, thuhet në njoftimin e OVL-UÇK-së.

Ndërkohë, zhvillimet e ditës së hënë ishin tensionuese me protesta (ndërhyrje nga policia me gaz-lotsjellës) në Prishtinë deri në orët e vona nga u kërkua që të votohet edhe në Leximin e dytë Projektligji për ndryshimet e Ligjit për Specialen. Dje, në një seancë të jashtëzakonshme në Kuvendin e Kosovës, me 91 vota për, asnjë kundër dhe asnjë abstenim është miratuar në parim Projektligji për ndryshimet e Ligjit për Specialen.