Opozita konservatore në Australi ka propozuar uljen më të madhe të emigracionit në historinë e vendit, duke e lidhur drejtpërdrejt rritjen e numrit të të ardhurve me presionin mbi tregun e banesave, infrastrukturën dhe koston e jetesës.
Sipas planit, numri i vizave të përkohshme do të reduktohej me rreth 650 mijë gjatë katër viteve, ndërsa emigracioni neto do të kufizohej në 100 mijë persona në vit për dy vitet e para.
Propozimi parashikon gjithashtu përgjysmimin e vizave humanitare në 10 mijë në vit, kufizimin e numrit të studentëve ndërkombëtarë në 240 mijë dhe heqjen e programit që u mundëson të diplomuarve të huaj të qëndrojnë përkohësisht në Australi pas përfundimit të studimeve.
Sipas Reuters, opozita argumenton se ritmet e larta të emigracionit kanë shtuar presionin mbi strehimin, transportin dhe shërbimet publike, në një periudhë kur çmimet e banesave dhe qiratë janë kthyer në një nga shqetësimet kryesore të familjeve australiane.
Në të njëjtën kohë, plani nuk parashikon mbylljen e tregut të punës për profesionistët e huaj. Përkundrazi, opozita synon të shtojë me 100 mijë vizat e përkohshme për punonjës të kualifikuar, veçanërisht në sektorë ku ka mungesë fuqie punëtore, si ndërtimi.
Çështja e emigracionit është bërë gjithnjë e më e ndjeshme në Australi pas rihapjes së kufijve në vitin 2022, kur numri i të ardhurve u rrit ndjeshëm. Emigracioni neto ka rënë ndërkohë, por në mesin e vitit 2025 mbetej rreth 306 mijë persona.
Qeveria laburiste ka vendosur gjithashtu objektiva për uljen e emigracionit, por është më pak agresive: synimi aktual është që fluksi neto të ulet në rreth 225 mijë persona deri në vitin 2028.
Debati po zhvillohet në një moment kur Australia përballet me mungesë banesash, çmime të larta të pronave dhe rritje të kostos së jetesës, duke e kthyer emigracionin nga një politikë kryesisht ekonomike në një nga temat më të forta të debatit politik.
