Dy anije tregtare goditen nga dronët në Detin e Zi, pranë brigjeve të Bullgarisë

Dy anije tregtare janë goditur nga dronët në Detin e Zi, pranë brigjeve të Bullgarisë, duke shkaktuar fundosjen e njërës prej tyre.

Kryeministri bullgar Rumen Radev pritet të bëjë një deklaratë në orën 11:15 sipas kohës lokale, në nisje të një takimi emergjent për incidentin.

Ekuipazhi i anijes së fundosur rezulton i zhdukur, ndërsa 18 anëtarët e ekuipazhit të anijes së dytë janë shpëtuar pasi shpërtheu një zjarr në bord. Disa prej tyre kanë mbetur të plagosur dhe janë transportuar në bordin e tragetit bullgar Dioscuria.

Sipas medias bullgare Maritime.bg, anijet janë identifikuar si Alfa Watan, e cila u fundos, dhe Able. Ende nuk është përcaktuar origjina e dronëve që shkaktuan sulmet.

Të dhënat e gjurmimit të anijeve tregojnë se Alfa Watan, e cila lundronte nën flamurin e Togos, ishte nisur drejt portit rumun të Sulinës. Pozicioni i saj i fundit u regjistrua pak pas orës 01:00 të së martës, rreth 70 milje detare larg brigjeve të Bullgarisë.

Incidenti vjen vetëm një ditë pas sulmit ndaj një tjetër anijeje mallrash në Detin e Zi, në pronësi turke dhe me ngarkesë gruri. Anija u godit nga të paktën një dron dhe më pas u përfshi nga flakët, duke përfunduar e fundosur.