Izraeli rrezikon të përballet me kolaps të brendshëm ose luftë civile për shkak të tensioneve mes izraelitëve, thuhet në një raport të muajit gusht të hartuar nga ekspertë të CIA-s, të ngarkuar për të ofruar "analiza alternative", sipas një raporti të publikuar të hënën.
Raporti i CIA-s, i titulluar "Frakturë nga Brenda" (*Fracture From Within*), thekson se Izraeli ndodhet përballë një situate të paqëndrueshme në prag të zgjedhjeve të 27 tetorit, në të cilat kryeministri izraelit Benjamin Netanyahu do të luftojë për të ardhmen e tij politike.
Autorët vunë në dukje se një nga çështjet politike që shkakton më shumë përçarje në Izrael është përjashtimi afatgjatë nga shërbimi ushtarak, nga i cili përfitojnë izraelitët ultra-ortodoksë.
Kjo mosmarrëveshje ka nxjerrë në pah përçarje të thella brenda bllokut të djathtë të Netanyahut dhe ka ngritur pikëpyetje nëse ai do të gëzojë mbështetjen e dy partive ultra-ortodokse: "Judaizmi i Bashkuar i Torës" dhe "Shas" aleatët e tij më të besueshëm që nga koha kur ai u bë kryeministër për herë të parë në vitin 1996.
Ndërsa qindra mijëra rezervistë janë mobilizuar për sulmet e Izraelit në Gaza dhe për luftërat kundër Libanit, Sirisë dhe Iranit, burrat ultra-ortodoksë historikisht kanë qenë të përjashtuar nga shërbimi i detyrueshëm ushtarak, me qëllim që t'u përkushtohen studimeve fetare me kohë të plotë në shkollat fetare. Versus.al
