Rey Manaj po përjeton një moment të artë me fanellën kuqezi dhe statistikat e fundit e konfirmojnë këtë.
Sulmuesi i Shqipërisë shënoi edhe në transfertën ndaj Finlandës, duke gjetur rrjetën që në minutën e katërt. Edhe pse kuqezinjtë nuk arritën të merrnin pikë në Helsinki, Manaj e bëri sërish detyrën e tij.
Në dy ndeshjet e fundit me Kombëtaren, 29-vjeçari ka regjistruar dy gola dhe një asist, një ritëm që e afron gjithnjë e më shumë me emrat historikë të futbollit shqiptar.
Manaj tashmë ka 13 gola me Shqipërinë, duke barazuar Ervin Skelën dhe Sokol Cikalleshin në listën e golashënuesve kuqezi. Vetëm një gol më shumë ka Alban Bushi, shkruan A2.
Por, objektivi i radhës është edhe më i madh. Përpara Manajt është Erjon Bogdani, rekordmeni i Shqipërisë me 18 gola. Me tre ndeshje të tjera në program, ndaj San Marinos, Finlandës dhe Bjellorusisë, sulmuesi mund ta ngushtojë ndjeshëm diferencën me legjendën kuqezi.
Forma e tij është një nga pikat pozitive për Shqipërinë dhe tashmë çdo gol i Manajt e afron më shumë me majën e historisë së Kombëtares. (A2 Televizion)
A2 CNN Livestream
MUND TE LEXONI GJITHASHTU
