Kreu i PBDNJ-së, Vangjel Dule, komentoi në emisionin “Minuta e Parë” në “News24” zhvillimet e fundit lidhur me skandalin në SHISH, i cili solli arrestimin e Vlora Hysenit.
Sipas Dules, ajo që është bërë publike deri tani përfaqëson vetëm “majën e ajsbergut”, ndërsa problematika mund të jetë shumë më e gjerë dhe më shqetësuese.
Të lidhura
None found
Dule kujtoi se në Komisionin Hetimor të ngritur nga parlamenti në vitin 2014 u përmendën disa politikanë si persona të dyshuar se ishin përgjuar në mënyrë të paligjshme, por rasti i tij ishte i vetmi që u bë publik. Ai tha se kjo tregon një prirje të përfshirjes së institucionit në çështje të jetës së brendshme politike, përtej misionit të tij. Sipas tij, situata e fundit ka prekur fusha që në çdo sistem konsiderohen të paprekshme dhe bëhet edhe më e rrezikshme pasi Shqipëria nuk është një vend i izoluar. Ai e cilësoi këtë si kërcënim për interesat kombëtare të vendit, por edhe për aleatët e tij, në një kohë kur bota perëndimore, pjesë e së cilës është Shqipëria, përballet me kërcënime dhe vendi nuk po tregon përgjegjësinë e duhur. Dule ngriti gjithashtu shqetësimin se nuk ka një vlerësim të qartë nga aleancat ndërkombëtare ku Shqipëria është pjesëtare.
Ai theksoi se mbetet për t’u parë se si do të vijojë procesi dhe cilat do të jenë përfundimet e drejtësisë. Në të njëjtën kohë, Dule akuzoi Prokurorinë e Posaçme për veprime selektive. Sipas tij, nuk mund të arrestohet ish-kreu i shtetit, Presidenti, në mes të ditës dhe të shkaktohet dhunë vetëm në një rast, ndërsa institucioni që ka marrë mbështetje më të madhe se çdo institucion tjetër duhet ta justifikojë atë përmes transparencës dhe mungesës së selektivitetit.
