Paketa e re e zgjerimit/ Komisionerja Marta Kos: Na duhet një BE më e madhe

Komisionierja për Zgjerimin në BE, Marta Kos, ndau një mesazh ndërsa këtë të martë Komisioni Europian miratoi një paketë të re për politikat e zgjerimit.

Kos thekson se në vlerësimet aktuale vihet re se BE-ja mund të akomodojë një anëtarësim më të madh.

Ajo shprehet se ndryshimet që vijnë përmes kësaj pakete të re duhet të sigurojnë një të ardhme të një Bashkimi Europian më të madh në numër, më të fortë dhe më të aftë.

“Vlerësimi ynë tregon se BE-ja mund të akomodojë një anëtarësim më të madh. Por ka fusha ku shohim sfida që duhet t'i adresojmë. Njëra është sundimi i ligjit dhe bashkëpunimi i sinqertë, ku ne po propozojmë mundësi më të forta për të parandaluar kthimin prapa, duke përfshirë uljen e fondeve ose kufizimin e të drejtave të votës. Së dyti, ne propozojmë të shqyrtojmë marrëveshje të synuara për integrimin e sektorit bujqësor të Ukrainës. Dhe ne po propozojmë mënyra për t'i bërë institucionet tona më të thjeshta dhe të afta të marrin vendime më shpejt. Këto ndryshime duhet të sigurojnë që një Bashkim Evropian më i madh të jetë gjithashtu një Bashkim më i fortë, i aftë të formësojë të ardhmen e vet”,-thekson Kos./CNA