Shpallet gjendja e emergjencës/ Fruthi 'shpërthen' në të gjithë vendin, konfirmohen 108 raste, nisin masat ekstreme

Guvernatorja e New York-ut, Kathy Hochul, ka shpallur gjendjen e emergjencës në të gjithë shtetin për shkak të shtimit të rasteve të fruthit. Masa do të jetë në fuqi deri më 4 nëntor dhe synon forcimin e masave për vaksinimin dhe frenimin e përhapjes së sëmundjes.

Sipas urdhrit ekzekutiv, autoritetet kanë zgjeruar edhe listën e profesionistëve shëndetësorë që mund të administrojnë vaksinën MMR, e cila mbron nga fruthi, shytat dhe rubeola.

Deri më 3 tetor, në New York janë konfirmuar 108 raste me fruth. Shtatë prej tyre janë regjistruar në qytetin e New York-ut, ndërsa 101 raste të tjera në zona të ndryshme të shtetit. Rritja më e ndjeshme është evidentuar në komunitetet rurale, ku nivelet e vaksinimit janë më të ulëta.

Që prej 15 korrikut, në 18 qarqe janë raportuar 92 raste, ndërsa autoritetet lokale kanë administruar mbi 1 mijë doza të vaksinës MMR.

Me masat e reja, vaksinën mund ta administrojnë edhe paramedikët, profesionistët e avancuar të shërbimeve mjekësore të urgjencës, mamitë dhe farmacistët. Ndërkohë, infermierët do të kenë mundësi të urdhërojnë testime për personat që dyshohet se janë prekur nga fruthi.

Autoritetet shëndetësore theksojnë se një dozë e vaksinës MMR siguron rreth 93% mbrojtje ndaj fruthit, ndërsa dy doza e rrisin mbrojtjen në rreth 97%.

Sipas të dhënave të CDC-së, deri më 1 tetor në Shtetet e Bashkuara janë konfirmuar 3,887 raste të fruthit gjatë vitit 2026, ndërsa rreth 95% e tyre janë të lidhura me shpërthime të sëmundjes.

Situata paraqitet veçanërisht shqetësuese në Pensilvani, ku deri më 2 tetor ishin raportuar 977 raste dhe pesë viktima. Më pas, autoritetet njoftuan se numri i rasteve kishte kaluar 1 mijë.

Fruthi është një sëmundje virale shumë ngjitëse që transmetohet kryesisht përmes ajrit. Përveç temperaturës së lartë dhe skuqjeve në lëkurë, në raste të rënda mund të shkaktojë komplikacione si pneumonia, encefaliti dhe, në raste të rralla, vdekjen.

Të dhënat e CDC tregojnë se SHBA po përballet në vitin 2026 me numrin më të lartë të rasteve të fruthit që nga viti 1991.

Për krahasim, gjatë gjithë vitit 2025 u raportuan 2,289 raste të konfirmuara, ndërsa këtë vit shifra ka kaluar 3,800 që në fillim të tetorit.