Antonio Conte ka dhënë sinjale për atë që pret nga skuadra e tij e ardhshme, duke deklaruar se dëshiron të marrë drejtimin e një klubi me histori të madhe dhe ta rikthejë atë në majat e futbollit.
Deklarata e trajnerit italian ka rikthyer në vëmendje spekulimet për një të ardhme të mundshme te Manchester United, klub që vazhdon të kërkojë stabilitet dhe rezultate pas disa sezoneve të vështira.
Conte është pa klub që prej largimit nga Napoli, ku gjatë periudhës së tij dyvjeçare arriti të fitojë titullin e Serie A. Me këtë sukses, ai u bë vetëm trajneri i dytë që i dhuroi Napolit titullin kampion që prej epokës së Diego Maradonës në fundin e viteve ’80.
Karriera e tij përfshin gjithashtu tituj kampionë në Itali me Juventusin dhe Interin, si dhe triumfin në Premier League me Chelsea-n në sezonin e tij të parë në Angli. Conte ka drejtuar edhe Tottenham-in.
Në një intervistë për “The Athletic”, italiani foli për ambiciet që duhet të ketë një trajner kur merr drejtimin e një klubi me histori të madhe.
“Nëse shkon në një klub ku historia flet vetë – një histori e mbushur me trofe, tituj dhe fitore – mund ta nderosh atë histori vetëm në një mënyrë: duke pasur ambicien për ta rikthyer klubin, nëse sot nuk është aty, për të luftuar për ato objektiva”, ka thënë Conte.
Ai shtoi se dëshiron të punojë në një klub ku objektivi nuk është vetëm pjesëmarrja, por konkurrimi për trofe.
“Ka shumë klube që kanë humbur disi lidhjen me historinë e tyre. Do të doja të shkoja te një prej këtyre klubeve, ta nxirrja sërish në pah atë histori dhe ta bëja të shkëlqejë edhe një herë. Klube ku ka presion dhe ku e di shumë mirë se nuk shkon thjesht për të marrë pjesë, por për të konkurruar”, u shpreh trajneri italian.
Manchester United është përmendur prej kohësh si një prej klubeve që mund të lidhet me Conte-n, sidomos në një periudhë kur skuadra angleze po përballet sërish me presion për rezultatet.
Titulli i fundit i Premier League për “Djajtë e Kuq” daton në sezonin 2012/13, në vitin e fundit të Sir Alex Ferguson në stol. Që atëherë, United nuk ka mundur të rikthehet në luftën e vazhdueshme për titull, ndërsa sigurimi i një vendi në zonën Champions League ka qenë një prej objektivave kryesorë të viteve të fundit.
Megjithatë, qëndrimi i Conte-s në klubet ku ka punuar ka qenë zakonisht relativisht i shkurtër. Ai nuk ka qëndruar më shumë se dy vjet në një klub që prej periudhës së tij te Juventusi, ku drejtoi nga viti 2011 deri në 2014.
Ish-kapiteni i Manchester United, Gary Neville, ka shprehur më herët dyshime nëse Conte do të ishte zgjedhja e duhur për klubin.
“Është një trajner i madh, por mendoj se trajnerë të caktuar përshtaten me klube të caktuara dhe personalisht nuk mendoj se Conte i përshtatet United”, ka deklaruar Neville.
Për momentin, Conte nuk ka konfirmuar ndonjë interes konkret për Manchester United, ndërsa deklaratat e tij për klubin e ardhshëm kanë shtuar vetëm spekulimet rreth një rikthimi të mundshëm të tij në Premier League.
Top Channel
