Deputeti i Aleancës për Ardhmërinë e Kosovës, Ramush Haradinaj, ka akuzuar kryeministrin Albin Kurti se po e çon vendin drejt zgjedhjeve të reja, për shkak të mungesës së një marrëveshjeje për ligjin për Dhomat e Specializuara dhe zgjedhjen e presidentit.
Në një konferencë për mediat, Haradinaj e cilësoi të pandershme që procesi i miratimit të ligjit për Gjykatën Speciale të mbetet përgjysmë, veçanërisht në një moment që ai e konsideroi kritik për mbrojtjen e ish-krerëve të Ushtrisë Çlirimtare të Kosovës.
Haradinaj vijoi akuzat ndaj Kurtit, duke pretenduar se kryeministri po punon për ta zhbërë Kosovën. Sipas tij, një gjë e tillë nuk do të arrihet, pasi, siç u shpreh ai, Kosova është më e madhe se Kurti, të cilin e cilësoi si një “keqbërës patologjik”.
“Kjo është herë e katërt që po e çon vendin në zgjedhje i njëjti person, i njëjti vendimmarrës. Kurti e kurthoi edhe ligjin edhe vendin… i dha një goditje të rëndë ligjit për Dhomat e Specializuara”, tha Haradinaj.
Deklaratat e tij vijnë në një kohë kur skena politike në Kosovë vijon të përballet me ngërç lidhur me funksionimin e institucioneve dhe çështjet që kërkojnë konsensus politik.