Aktorja Monika Lubonja ka reaguar për herë të parë pas publikimit të videove intime ku shfaqet së bashku me kompozitorin Adi Hila. Në një reagim publik, Lubonja thotë se nuk ka pasur dijeni dhe nuk ka dhënë pëlqimin për t’u filmuar apo që materiale intime të saj të shpërndahen dhe publikohen.
Lubonja shprehet se është ndjerë e tradhtuar dhe kërkon që ajo të mos bëhet objekt gjykimi apo spekulimesh publike për shkak të një marrëdhënieje ku, sipas saj, kishte dhënë besimin e saj.
“Ju drejtohem sot me dhimbjen e një gruaje së cilës i është shkelur besimi dhe privatësia, por edhe me vendosmërinë për të mbrojtur dinjitetin dhe të drejtat e saj.
Kërkoj dhe shpresoj të ndalet baltosja ime në emër të një ‘morali kolektiv’. Dinjiteti i një njeriu ndërtohet gjatë gjithë jetës dhe nuk mund të zhbëhet nga tradhtia e dikujt të cilit i fala disa vite të jetës sime.
Nuk kam pasur dijeni, nuk kam dhënë pëlqim të filmohem, të regjistrohem apo që materiale intime të shpërndahen, të shiten ose të publikohen. Kam dashur dikë dhe kam besuar. Nuk turpërohem për dashurinë që kam dhënë. Më dhemb që besimi im është kthyer në armë kundër meje”, shkruan aktorja.
Ajo u ka bërë thirrje mediave të respektojnë privatësinë e saj dhe të mos publikojnë apo spekulojnë rreth materialeve intime.
“Mediave u kërkoj të respektojnë privatësinë time dhe të mos publikojnë apo të spekulojnë me publikime të materialeve intime.
Opinionit publik i kërkoj të mos e kthejë dhimbjen time në argëtim dhe të mos më gjykojë për besimin që i dhashë një njeriu të pabesë”, vijon reagimi.
Lubonja bën të ditur gjithashtu se i është drejtuar drejtësisë dhe se do ta ndjekë çështjen në rrugë ligjore deri në fund.
“I jam drejtuar drejtësisë dhe do ta ndjek këtë rrugë deri në fund.
Dinjitetin tim dhe pabesinë nuk ia fal askujt që përdori jetën time! Do e ndjek ligjërisht dhe jam e sigurt që e vërteta do flasë.
Zotit i kërkoj forcë që kjo plagë të mos ma mbushë zemrën me urrejtje. Besoj se ai e njeh të vërtetën time dhe pres që drejtësia të bëjë punën e saj”, përfundon Monika Lubonja.