Suedia do të dërgojë një sistem amerikan të mbrojtjes ajrore “Patriot” në Poloni, me synim forcimin e mbrojtjes së një prej qendrave kryesore logjistike për transportimin e ndihmës ushtarake dhe humanitare drejt Ukrainës.
Sistemi do të vendoset në Rzeszow, në juglindje të Polonisë, pranë kufirit me Ukrainën. Me të do të angazhohen rreth 100 ushtarakë suedezë, të cilët do të marrin pjesë në mbrojtjen e qendrës logjistike.
Ministrja e Jashtme suedeze, Maria Malmer Stenergard, tha se kontributi i Stokholmit synon të garantojë vijimin e mbështetjes ushtarake dhe humanitare për Ukrainën.
Kontingjenti suedez pritet të mbërrijë në fillim të dhjetorit, duke zëvendësuar një njësi ushtarake holandeze që aktualisht është e angazhuar në këtë mision.
Rzeszow konsiderohet një pikë me rëndësi të veçantë strategjike për mbështetjen e Ukrainës, pasi përmes saj kalon një pjesë e konsiderueshme e ndihmës së dërguar nga vendet perëndimore drejt Kievit. Për këtë arsye, mbrojtja ajrore e zonës është bërë një prioritet në kushtet e kërcënimit nga sulmet ruse.
Vendosja e sistemit “Patriot” përbën gjithashtu një tjetër angazhim të Suedisë në kuadër të NATO-s. Pas nisjes së pushtimit rus të Ukrainës në shkurt 2022, Stokholmi braktisi politikën e mosangazhimit ushtarak, e cila kishte zgjatur për rreth dy shekuj, dhe u anëtarësua zyrtarisht në NATO në mars 2024.
Suedia ka kontribuar edhe më herët në misionet e Aleancës për mbrojtjen e hapësirës ajrore të Polonisë. Vitin e kaluar, avionët luftarakë suedezë “Gripen” morën pjesë në një mision të NATO-s për monitorimin dhe sigurimin e hapësirës ajrore polake.
#Suedia #Poloni #Ukrainë #NATO #Patriot #Rusia #MbrojtjaAjrore #LuftaNëUkrainë #Rzeszow