TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
TPZ.al është një media online e pavarur. Përpjekja jonë është të sjellim lajme, analiza dhe komente, në shërbim të interesit publik.
Presidenti amerikan Donald Trump ka deklaruar se protestat e fundit të nxënësve të shkollave të mesme në Francë janë pasojë e emigracionit masiv dhe islamit, duke e lidhur zhvillimin me atë që ai e përshkruan si humbje të kontrollit mbi vendin.
Në një postim në platformën e tij Truth Social, presidenti amerikan shkroi se ajo që po ndodh në Francë “nuk është asgjë tjetër veçse emigracion masiv jashtë kontrollit”.
Sipas Trump, problemi nuk lidhet me shkollat, por me “islamin që kërkon të marrë nën kontroll një vend dikur të madh”.
Deklaratat e tij vijnë ndërsa në Francë prej disa ditësh vazhdojnë protestat e nxënësve të shkollave të mesme.
Demonstruesit kërkojnë më shumë financime dhe burime për arsimin, ndërsa protestat janë shoqëruar në disa raste me tensione dhe përplasje me forcat e rendit.
Qëndrimi i Trump është përforcuar edhe nga komentatorë të krahut të djathtë amerikan, veçanërisht figura të afërta me lëvizjen MAGA (Make America Great Again).
Ata kanë shpërndarë në rrjetet sociale video nga protestat në Francë, duke i paraqitur ato si një paralajmërim për atë që, sipas tyre, mund të ndodhë në Shtetet e Bashkuara të Amerikës.
Komentatori konservator Dave Rubin, i cili ka rreth 1.6 milionë ndjekës në X, shkroi se një situatë e tillë mund të ndodhë edhe në SHBA nëse demokratët rikthehen në pushtet.
Ndërsa komentatori Glenn Beck e përshkroi situatën si pjesë të një “rrjeti ndërkombëtar socialist” që synon të çmontojë Perëndimin.
Deklaratat e presidentit amerikan vijnë gjithashtu në një moment të vështirë politik për Partinë Republikane.
Sipas artikullit, partia e tij po has vështirësi në sondazhe përpara zgjedhjeve të mesmandatit më 3 nëntor dhe ekziston mundësia që republikanët të humbasin kontrollin e Kongresit.
Një nga problemet kryesore për administratën Trump është kostoja në rritje e jetesës, për të cilën presidenti po kritikohet nga një pjesë e elektoratit amerikan.
Kjo mund të ndikojë negativisht në rezultatin e zgjedhjeve.
Ndërkohë, në Francë, dhjetëra mijëra gjimnazistë dolën sot në rrugët e Parisit dhe qyteteve të tjera.
Protestave iu bashkuan mësues, studentë dhe sindikalistë, të cilët kërkojnë më shumë burime për arsimin.
