Braçe i jep mesazh “tërthorazi” PS-së: Kam rënë në dashuri me garën për Bashkinë Tiranë

Deputeti socialist Erion Braçe foli sot lidhur me ambicien e tij për të kandiduar në zgjedhjet për Bashkinë Tiranë.

Në një emision televiziv, Braçe u shpreh se në këtë fazë para zgjedhjeve kërkon nga Partia Socialiste që të zgjedhë përmes garës brenda partisë kandidatin më të mirë për të kandiduar.

Socialisti theksoi se e sheh detyrën e kryebashkiakut si një vend pune dhe jo si ofiq.

“Tani po kërkoj një gjë, po kërkoj garë që kjo parti ku unë kam gjithë jetën të përzgjedhë përmes garës kandidatin më të mirë për të kandiduar për të drejtuar Tiranën. Unë me këtë garën kam rënë në dashuri dhe besoj e kam shfaqur aq shumë sa të gjithë po e mohojnë garën. Unë nuk e shikoj Bashkinë e Tiranës si ofiq, e shikoj si vend pune. Unë dua vendin e punës, jo bashkinë, karrige, influencë, Nuk dua që nga Bashkia e Tiranës të bëhem kryeministër”,-tha Braçe./CNA