PDK propozon Eliza Hoxhajn si kandidate për Presidente, Hamza: Justina Shiroka-Pula është emër i pranueshëm
Kryetari i Partisë Demokratike të Kosovës (PDK), Bedri Hamza, ka deklaruar se emri i Justina Shiroka-Pulës është i pranueshëm për postin e Presidentes së Kosovës.
Hamza ka bërë të ditur se PDK-ja do të propozojë Eliza Hoxhajn si kundërkandidate për këtë post.
Kreu i PDK-së doli në konferencë për media i shoqëruar nga 22 deputetë të partisë.
“Mendoj që është dashur të ketë seriozitet në këtë çështje, për situatën në të cilën ndodhemi”, ka deklaruar Hamza.
Ai tha se pas konferencës, deputetët e PDK-së do të shkojnë në Kuvend, ku pritet të votojnë ndryshimin e ligjit.
“PDK-ja, nga kjo konferencë, do të shkojë në Kuvend dhe presim ta votojmë ndryshimin e ligjit. Çështja tjetër, për PDK-në Justina Shiroka-Pula është një emër i pranueshëm për Presidente. PDK-ja, si kundërkandidate, e propozon edhe Eliza Hoxhajn”, ka thënë Hamza.
