Kosovë/ Merr fund kriza politike, Justina Shiroka Pula zgjidhet Presidente me 81 vota: Do punoj për unitetin e vendit! Kuvendi miraton edhe ndryshimet në ligjin për Gjykatën Speciale

Foto: Albin Kurti

Kryeministri i Kosovës, Albin Kurti, ka reaguar pas zgjedhjes së Justina Shiroka-Pulës presidente të Kosovës dhe miratimit të ndryshimeve në Ligjin për Dhomat e Specializuara dhe Prokurorinë e Specializuar në Hagë.

Përmes një njoftimi në rrjete sociale Kurti shprehet se Kosova ka institucione stabile, ndërsa do të vijojnë punën për të liruar ish-krerët e UÇK-së.

"Republika ka presidente të re, profesoreshën Justina Shiroka-Pula, Kosova ka institucione stabile. Kemi edhe ligjin me ndryshime për Dhomat dhe Prokurorinë e Specializuar në Hagë dhe do të punojmë bashkë për suksesin e ish-krerëve të UÇK-së në apel.

Falënderoj deputetët pjesëmarrës në votim, sikurse edhe kryetarin Hamza që pranoi propozimin. Shumë mund e përpjekje, për kompromisin në fund. Për Republikën e Kosovës!

Urime presidentes së re dhe të gjithë qytetarëve", shkroi Kurti.

Pas betimit, presidentja e re e Kosovës, Justina Shiroka-Pula, mbajti fjalën e saj të parë para Kuvendit. Ajo u zotua se mandati i saj do të jetë në shërbim të Kosovës, forcimit të institucioneve, qytetarëve dhe forcimit të marrëdhënieve me aleatët.

“Sot e pranoj me nder të madh dhe përgjegjësi të plotë detyrën si Presidente e Kosovës. Ky mandat i përket qytetarëve tanë, institucioneve tona. Do të jem presidente e të gjithë qytetarëve, pa dallim etnik apo shoqëror, do të punoj për forcimin e institucioneve tona. Kosova duhet të ecë përpara si shtet demokratik, i sigurt dhe me miqësi të fortë me aleatët tanë. Do ta mbroj kushtetutën, interesin e republikës dhe qytetarët tanë. Besoj në Kosovë, besoj se së bashku mund të ndërtojmë një të ardhme më të mirë për brezat që do të vijnë. Zoti e bekoftë Republikën e Kosovëvs!”, tha presidentja.

Presidentja e re e Kosovës, Justina Shiroka-Pula, ka bërë betimin para Kuvendit, me zgjedhjen e saj në këtë detyrë.

“Betohem se tërë fuqinë time do t’ia kushtoj ruajtjes së pavarësisë dhe integritetit territorial, respektimit dhe mbrojtjes së Kushtetutës dhe ligjeve. Me ndërgjegje e përgjegjësi do t’i kryej të gjitha detyrimet e mia. Betohem!”, tha presidentja.

Pas fjalës së saj, të gjithë u ngritën në këmbë për të vijuar me himnin e flamurit.

Justina Shiroka-Pula është zgjedhur si Presidente e Kosovës. Eliza Hoxha, e cila ishte kandidatja e PDK, mori vetëm 1 votë, ndërsa 2 ishin të pavlefshme.

Votimi, i cili nisi disa minuta para se të trokiste mesnata, zgjati deri në orën 00:03, duke kaluar afatin kushtetues të 6 tetorit.

Kuvendi i Kosovës ka miratuar në lexim të dytë me 88 vota pro ndryshimet në Ligjin për Dhomat e Specializuara. Ky moment u prit me duartrokitje nga të pranishmit.

Me këtë votim, Kuvendi përmbylli shqyrtimin e projektligjit, i cili ishte miratuar në lexim të parë më 5 tetor.

Nisma për ndryshimin e ligjit është propozuar nga Partia Demokratike e Kosovës më 21 shtator, pak ditë pas shpalljes së aktgjykimit ndaj katër ish-krerëve të Ushtrisë Çlirimtare të Kosovës në Hagë. Ndryshimet e propozuara prekin disa çështje që lidhen me funksionimin dhe juridiksionin e Dhomave të Specializuara, përfshirë mundësinë që raste të caktuara jashtë juridiksionit të tyre të procedohen në Kosovë. Projektligji parasheh gjithashtu mundësinë e ankesës në Gjykatën Supreme të Kosovës, kufizimin e dënimit maksimal me burgim në 15 vjet, si dhe mbajtjen e dënimeve në Kosovë.

Çfarë janë Dhomat e Specializuara?

Dhomat e Specializuara dhe Zyra e Prokurorit të Specializuar, të njohura gjerësisht si Gjykata Speciale, u themeluan në vitin 2015 nga Kuvendi i Kosovës dhe janë pjesë e sistemit gjyqësor të Kosovës, por funksionojnë në Hagë me personel ndërkombëtar. Ato kanë mandat të hetojnë dhe gjykojnë pretendimet për krime të kryera nga pjesëtarë të UÇK-së në periudhën nga janari 1998 deri në dhjetor 2000.