Wladimir Klitschko ka kërkuar përfshirjen e autoriteteve në hetimin e disa sendeve personale të ish-të fejuarës së tij, aktorja Hayden Panettiere, që dyshohet se janë zhdukur pas vdekjes së saj.
Në dokumentet e dorëzuara në gjykatë, ish-boksieri ukrainas pretendon se një person jashtë familjes, i cili kishte pasur më herët lidhje me Panettiere, mund të ketë dërguar disa prej sendeve të saj në një dyqan pengjesh. Sipas tij, mes tyre mund të ketë edhe bizhuteri.
Klitschko thotë se dyqani i pengjeve nuk ka pranuar të japë informacion të detajuar për sendet pa u kontaktuar fillimisht nga autoritetet e zbatimit të ligjit. Për këtë arsye, ai po kërkon që të lejohet të autorizojë një hetim policor për identifikimin dhe rikthimin e tyre.
Kërkesa lidhet edhe me përpjekjen e Klitschko-s për t’u emëruar kujdestar i përkohshëm i pasurisë së vajzës së tij dhe Panettiere, Kaya, 11 vjeçe. Sipas dokumenteve, Kaya është trashëgimtarja e vetme e pasurisë së nënës së saj dhe Klitschko dëshiron të sigurohet që asetet të ruhen për të.
Në një kërkesë të mëparshme, Klitschko kishte ngritur shqetësime për sende të tjera që mungonin nga prona e aktores. Ai kishte deklaruar gjithashtu se para vdekjes së Panettiere ishte angazhuar një kompani sigurie, pasi ishte raportuar një hyrje e paautorizuar në banesën e saj.
Më herët ishte raportuar edhe për zhdukjen e unazës së fejesës që Panettiere kishte marrë nga Klitschko. Sipas raportimeve, unaza, e cila kishte një diamant në formë smeraldi, nuk është gjetur pas vdekjes së aktores.
Panettiere, e njohur për rolet në serialet “Heroes” dhe “Nashville”, ndërroi jetë më 16 gusht 2026, në moshën 36-vjeçare. Sipas raportit të mjekut ligjor, vdekja u klasifikua si aksidentale dhe u lidh me efektet toksike të disa substancave.
Klitschko dhe Panettiere, të cilët kishin qenë në një lidhje për disa vite dhe ishin fejuar në vitin 2013, kanë së bashku vajzën Kaya. Një seancë për kërkesën lidhur me kujdestarinë e pasurisë është planifikuar të zhvillohet më 8 tetor.
