Një epokë ka marrë fund. Lionel Messi i ka dhënë lamtumirën kombëtares së Argjentinës në një natë të paharrueshme në Buenos Aires, duke e mbyllur kapitullin e tij ndërkombëtar me gol, asistime dhe emocione të forta.

39-vjeçari luajti ndeshjen e tij të 208-të dhe të fundit me fanellën e Argjentinës, në fitoren 3-0 ndaj Beninit. Messi shënoi nga pika e bardhë dhe regjistroi dy asistime, por ajo që mbeti më shumë në kujtesën e të gjithëve ishte momenti i lamtumirës së tij para tifozëve.

Përpara rreth 85 mijë tifozëve në “Monumental”, ylli argjentinas mbajti një fjalim gati 10-minutësh, ndërsa emocionet pushtuan stadiumin. Disa prej shokëve të tij të skuadrës, mes tyre edhe Enzo Fernandez, nuk i përmbajtën dot lotët.

“Ishte një natë me shumë emocione. Me siguri po harroj shumë gjëra që do të doja t’i thoja, sepse ky është një moment shumë i vështirë për mua. Personi i parë që më vjen në mendje është babai im”, tha Messi.

Më pas, legjenda argjentinase dha mesazhin që përmbledh më së miri ndjenjat e tij pas dy dekadash me kombëtaren:

“Largohem mirënjohës, krenar dhe në paqe. Faleminderit për gjithçka.”

Messi kishte njoftuar në gusht se do të tërhiqej nga futbolli ndërkombëtar, duke pranuar se vendimi e kishte lënduar, por se kishte ardhur momenti për t'i dhënë fund aventurës me Argjentinën.

Kjo ishte ndeshja e parë e tij me kombëtaren që prej ndarjes nga jeta të babait të tij, Jorge, në moshën 68-vjeçare pas një sëmundjeje të gjatë.

“Do të më dhembë shumë të mos jem më me Argjentinën”

Messi e pati të vështirë të ndahej nga fusha. Pas ndeshjes, ai pranoi se nuk dëshironte që ai moment të përfundonte.

“Kam shumë emocione që kalojnë nëpër mua. Nuk dua të largohem nga fusha. Nëse do të varej nga unë, do të doja të isha këtu gjithë jetën, sepse të luash për Argjentinën është gjëja më e bukur që ekziston”, tha ai.

“Për 20 vjet, edhe në momentet më të këqija, nuk ndalova kurrë së luftuari, së shtyri përpara dhe së dhëni gjithçka që kisha. Të mos vij më këtu dhe të mos jem më me kombëtaren e Argjentinës do të më dhembë shumë.”

Messi kujtoi edhe rrugëtimin e jashtëzakonshëm me përfaqësuesen, nga debutimi në vitin 2005 deri te triumfi historik në Kupën e Botës 2022.

“Ne kishim ëndrrën të realizonim jo vetëm ëndrrën time, por ëndrrën e një vendi të tërë: të bëheshim sërish kampionë bote. Dhe ia dolëm”, u shpreh ai.

Një karrierë e jashtëzakonshme

Messi debutoi me Argjentinën në vitin 2005, në një miqësore ndaj Hungarisë, ku u përjashtua me karton të kuq vetëm pak çaste pasi hyri në fushë. Nga ai fillim i vështirë, ai ndërtoi një prej kapitujve më të mëdhenj në historinë e futbollit.

Me Argjentinën, Messi fitoi Kupën e Botës dhe dy herë Copa América-n, duke u kthyer në simbolin e një epoke të artë të futbollit argjentinas.

Ai e mbyll aventurën ndërkombëtare me 208 ndeshje dhe 126 gola, duke qenë golashënuesi i dytë më i mirë në historinë e futbollit të kombëtareve, pas Cristiano Ronaldos.

Por ndeshja e fundit nuk ishte thjesht një statistikë. Messi ishte në qendër të vëmendjes që nga momenti kur mbërriti në stadium, ndërsa gjatë himnit kombëtar u pa i përlotur.

Para fillimit të takimit, tifozët krijuan një spektakël të jashtëzakonshëm me fishekzjarre dhe një fanellë gjigante të Argjentinës, me numrin 10 dhe fjalën “Gracias”.

Në minutën e 10-të, loja u ndërpre sërish për një tjetër ceremoni, me një ovacion të madh për Messin dhe përshëndetje nga të gjithë lojtarët e Beninit.

Në fushë, edhe në ndeshjen e fundit, Messi tregoi se klasi nuk njeh moshë. Ai ishte protagonist në aksionet e Argjentinës, dha dy asistime, fitoi raste të rrezikshme dhe realizoi golin nga penalltia.

Scaloni: Nuk kam parë kurrë një tjetër me atë aurë

Trajneri i Argjentinës, Lionel Scaloni, nuk i fshehu emocionet pas ndeshjes.

“Ka qenë një ëndërr e realizuar. Nuk e mendoja kurrë se do të isha trajneri i futbollistit më të mirë në histori. Jemi përjetësisht mirënjohës që na dha mundësinë të ishim pranë tij”, deklaroi Scaloni.

“Mos ta shohim më do të jetë e trishtueshme. Ai na lë një trashëgimi të jashtëzakonshme. Ndjesia që ke kur e ke Messin në krah është e pakrahasueshme. Nuk kam parë kurrë në jetën time dikë tjetër me atë aurë.”

Edhe Neymar, ish-shoku i tij i skuadrës te Barcelona dhe PSG, reagoi me një mesazh emocionues:

“Nuk është vetëm Argjentina që të falënderon. E gjithë bota të falënderon për gjithçka që ke bërë për futbollin.”

Ndërsa Rodrigo De Paul, një prej miqve më të afërt të Messit, e përshkroi ndikimin e tij përtej futbollit:

“Falë tij u rrita jo vetëm si futbollist, por edhe si person. U bëra një njeri më i mirë, një sportist më i mirë, një baba më i mirë dhe një mik më i mirë. Dua t’i them se e dua. Ai e di që është vëllai im dhe se ka një zemër të jashtëzakonshme.”

Një kapitull i artë është mbyllur. Messi nuk do ta veshë më fanellën e Argjentinës në një ndeshje zyrtare, por historia e tij me “Albiceleste”-t tashmë është shkruar përgjithmonë.

Një legjendë u largua nga skena ndërkombëtare me gol, asistime, lot dhe një stadium të tërë që i tha: “Gracias, Leo”.